Reportajen David Da Costa
Preparasaun Partidu Demokrátiku (PD) nian ba iha Eleisaun Parlamentár tinan ne’e, PD seidauk iha esperiénsia halo koligasaun antes ba eleisaun, tanba durante ne’e PD sempre aposta ba ninia forsa rasik, hanesan forma ida atu nafatin dinamiza demokrásia iha rai ida ne’e.
Sekretáriu Jerál Partidu Demokrátiku (PD) Antonio da Conceicao “Kalohan” hateten preparasaun PD nian ba eleisaun Parlamentár tinan ne’e, atu koligasaun antes ka depois koligasaun. Partidu PD hanoin hanesan partidu, seidauk to’o iha ne’eba tanba seidauk iha esperiénsia ida koligasaun antes eleisaun, tanba durante ne’e aposta ba ninia forsa rasik.
‘Ha’u hanoin hanesan partidu seidauk la’o to’o iha ne’eba, tanba PD seidauk iha esperénsia ida koligasaun antes eleisaun. Hanesan imi hotu akompaña durante ne’e PD sempre aposta ba ninia forsa rasik hanesan forma ida atu nafatin dinamiza demokrásia iha rai ida ne’e,” Antonio Informa ba jornalista sira, hafoin remata enkontru ho prezidente Ramos-Horta iha Palásiu Prezidensiál, Bairo-Pite, Kinta 12/01
Nia dehan PD sei nafatin ho hanoin ida, katak PD tenke la’o atu konkista podér liuhusi eleisaun, maibé mos prosesu edukativu ida, atu povu hola responsabilidade ba ninia destinu rasik bainhira nia bá vota.
“Tanba ida ne’e mak laiha hanoin atu forma koligasaun, maibé aumesmu tempu mós ami hatene dehan sira ne’ebé boot liu mós seidauk iha vontade, atu buat hanesan ita hotu hanoin daudauk,” nia hateten.
