Reportajen Adroaldo “Saretukau”
Defisiente Maria José hetan tan apoiu hosi Moving Company hosi Australia ne’ebé servisu hamutuk ho grupu Rotary horisehik (16/11) loraik hafoin sira hetan informasaun mak espalla iha média sosial ba publikasaun Neon Metin konabá Maria José nia kondisaun.
Inacia dos Santos, membru ida hosi Rotary iha Timor-Leste, ne’ebé fahe informasaun konabá difisiente Maria José, ikus mai membru Rotary hosi Australia interese hodi fo doasaun kadeira roda ida ho kamizola balu.
“Maibé kuandu ha’u share informasaun konabá imi nia notísia ne’e, iha kolega balu iha Darwin, servisu ho Moving Company, nia kontaktu ha’u iha Facebook, nia dehan alin ne’e nia kondisaun oinsá? Nia presiza kadeira roda modelu halo nusa? Entaun ha’u liga nia ho alin nia inan, sira komunika malu, haree nia kondisaun hosi foto, entaun sira kontaktu ami nia kolega Rotary iha Australia ne’e hodi mai fo tuir doasaun kadeira roda ne’e,” dehan Inacia.
Nia hatutan, “iha futuru sira hakarak tan fo doasaun maibé ita tenki husu lisensa ba Maria nia inan para tau nia foto iha sosial média para kompañia ne’ebá bele haree para haruka sasan mai, hanesan buat ne’ebé imi halo ne’e ajuda ema para, ema hakarak duni ajuda, lae ema lahatene, iha duni presiza, nesesidade, ita la fo sai entaun ema lahatene.”
Ba ajuda hosi Moving Company ne’ebé servisu hamutuk ho grupu Rotary, difisiente Maria José hetan ona apoiu hosi fatin tolu hanesan grupu Jesus Devina Misericordia, Asosiasaun Difisiénsia Timor-Leste (ADTL) ne’ebé kordena ho Centro Nacional de Rehabilitação (CNR) hodi apoiu mos kadeira roda ba difisiente Maria José.
Difisiente Maria José nia inan Maria Barreto hato’o agradese wa’in ba Moving Company ho Rotary hosi Australia ne’ebé ne’ebé apoiu ona kadeira roda ba nia oan feto. Maria Barreto mos hato’o obrigadu wa’in ba ema hotu ne’ebé ajuda fahe informasaun hosi média sosial ikus mai nia ona bele hetan duni saída mak nia hakarak, inklui grupu laran luak sira ne’ebé apoiu ona ba nia oan.
