Reportajen Adroaldo “Saretukau”
Hafoin udan durante oras 2 resin nia laran Sábadu loraik ne’e (19/11) iha sidade Díli, hamosu inundasaun iha área Bidau Mota Klaran, Suku Bidau Santana hodi afeta bee tama ba komunidade balu nia uma nomos mota lori lixu oi-oin tama komunidade nia uma leet no valeta, hodi difikulta movimentasaun públiku ba ema no transporte sira hotu, no sei impaktu mos rai rahun ba komunidade sira ne’ebé hela iha estrada ibun iha tempu loro.
Tuir observasaun Neon Metin, depois de udan, komunidade sira ho inisiativa rasik hamos valeta no fo’er sira ne’ebé tama komunidade nia uma no hein parte sanemantu munisípiu Díli hodi foti fo’er mak sira halibur. Iha entrevista, komunidade Bidau Mota Klaran, Carol Andre Valentinu Perreira Rodrigues hatete, inundasaun ida ne’e la’os foin akontese, maibé tinan-tinan sira sempre afeta sira, no akontesimentu ida ne’e bai-bain, maibé afeta liu tinan kotuk hodi estraga hotu komunidade nia uma no sasan.
“Inundasaun ne’e mai tanba impaktu hosi natureza entaun ita mos labele ses hosi ida ne’e, ita mos labele atu dehan katak fo sala ba sé, ida ne’e natureza, ida ne’e mak akontese tinan-tinan, liu-liu parte Aldeia Bidau Mota Klaran,” informa Carol ba Neon Metin, Sábadu ne’e.
Komunidade ne’e hatutan wainhira udan, sira labele halo movimentasaun tanba lixu nakonu iha valeta to’o estrada. “Nia impaktu ne’e mak lixu, hanesan agora da-dauk maun haree, lixu ne’e lahatene mai hosi ne’ebé, mak mai bou hotu iha ne’e, no estraga mos uma, balu sasan, ida ne’e mak inundasaun ne’ebé akontese maka’as wainhira udan boot,” nia salienta.
“Bidau Mota Klaran ne’e simu mota parte tolu, ida parte Becuse nian, ida parte mota ulun nomos parte hosi My Friend nian, ne’ebé mak hamutuk hotu to’o bee mai tama iha komunidade sira ne’ebé mak iha Bidau Mota Klaran,” Carol hatutan tan.
Hanesan komunidade ida, sira sempre afeta ba inundasaun iha tempu udan, nia husu ba governu tau matan ba ponte sira ne’ebé rai tama to’o besik tetuk hodi afeta bee halai tama ba komunidade nia uma. Nia mos husu atu hadi’a no haluan valeta nia medida hodi bee bele tama sai di’ak.
“Ami hosi komunidade Bidau Mota Klaran husu ba governu mak ne’e, tau matan ba fatin bee nian, liu-liu mos ponte ida Bidau Santana ne’e tanba agora afeta tama maka’as liu hosi ponte ne’ebá, bee baku tama mai, tanba rai henek okos ne’e badak ona, ponte ne’e badak hodi halo rai-henek ne’e besik ona ponte entaun bee ne’e mai nia labele liu, entaun bee ne’e mai afeta fali ba estrada hodi hamosu inundasaun tama kada uma,” Carol reprezenta komunidade husu ba governu.
