Reportajen Adroaldo “Saretukau”
Merita Cardoso, foinsa’e ida hosi Suku Matai, Postu Administrativu Maucatar – Covalima, liu hosi USAID nia Projetu Impact mak nia tuir, ho inisiativa nia ho nia kolega sira harii Grupu Hakbiit Feto Foinsa’e hodi halo kampaña liga ho asuntu feto no divórsiu liu hosi sosializasaun prevene abandona feto no labarik hodi promove família ida armonia no saudável liu iha sira nia suku rasik.
Liu hosi selebrasaun aniversáriu relasaun Estadus Unidus Amérika (EUA) ho Timor-Leste ba dala-20 ne’ebé organiza hosi Embaixada EUA iha Timor Plaza, Merita konta nia situasaun moris liu hosi programa talkshow ba programa sira EUA nian katak, nia família la iha ekonomia natoon hodi sustenta nia eskola iha universidade tanba ne’e nia lakoi lakon atu hasa’e nia koñesimentu liu hosi tuir aktividade sira.
Tanba ne’e mak nia hetan oportunidade tuir ajénsia EUA iha Timor-Leste USAID nia Projetu Impact, ne’ebé foka liu ba relasaun saudável livre hosi violénsia iha futuru. Programa ida ne’e nia objetivu mak atu hapara violénsia bajeia ba jéneru, promove igualdade jéneru, liu hosi métodu prevensaun konflitu.
Projetu ne’e rasik hala’o iha munisípiu Ermera, Liquiça no Marta nia munisípiu Covalima rasik. Hosi programa ida ne’e ajuda tebes forma Marta nia mentalidade nu’udar feto foinsa’e poténsia ida ne’ebé bele kontribui ba nia komunidade rasik.
“Programa Impact bele kapasita ha’u, bele mudansa iha mentalidade i nomos kapasita ha’u, suporta ha’u hahú harii grupu iha ha’u nia suku ho naran Hakbiit Feto Foinsa’e, ha’u mak nu’udar kordenadora. Ha’u kontente no apresia tebes ba Estadus Unidus Amérika ba oportunidade ne’ebé di’ak tebes tanba bele tulun ha’u sai joven ida ne’ebé mak bele duni tuir mehi ne’ebé mak ha’u hala’o,” Marta dehan iha talkshow iha Timor Plaza, Sábadu, 19/11.
Hafoin tuir programa ne’e, sira nia grupu identifika problema mak iha sira nia suku rasik, ikus sira desidi hodi halo mini kampaña no sosializasaun ba iha isu divórsiu ne’ebé mak sira identifika.
“Iha ne’ebá ami identifika problema barak, entaun ami fila-fali mai ho ha’u nia membru sira tuur hamutuk hodi fali problema ne’ebé mak ami identifika, ami haree problema ne’ebé importante. Iha ne’ebá ami foti de’it problema divórsiu, ne’e mak sai hanesan tópiku ida ba ami hodi bele halo sosializasaun ba inan-aman sira,” Marta hatete.
Iha sira nia aktividade, sira halo uluk mini kampaña ho tema prevene abandona feto no labarik hodi promove família armonia no saudável.
“Ami liga direita oradora hosi Polísia VPU, ami hakarak nia mak fahe informasaun ne’e fali ba komunidade sira, atu nune’e bele hasa’e komunidade sira nia konsiénsia para bele tulun sira, atu nune’e futuru mai, sira bele hamenus problema ne’ebé mak iha”, Marta hatutan
Marta mos dehan iha ne’ebá problema soe malu ne’e kan barak, kuandu soe malu ne’e, oan sira ne’e abandona, oan sira, sira obriga tenki fa’an, dala ruma oan sira abandona eskola, entaun ami haree ida ne’e barak liu iha ami nia komunidade, entaun ami foti ida ne’e sai hanesan tópiku ba ami hodi bele konvida komunidade sira, para sira hetan informasaun detallu konabá tópiku ida ne’e.
