Reportajen Joselina dos Santos
Prezidente Konsellu Imprensa (KI), Virgílio Guterres hato’o Parabens ba aniversariu Asosiasaun Jornalista Timor Lorosa’e (AJTL) ne’ebe selebra ba dala 22, nune’e loke mos semináriu nasional ho tema “Independénsia Editoriál Iha Kontextu Eleisaun no Feto iha Kareira”, ho objetivu hodi bele hasae kapasidade ka koiñesimentu jornalista sira nian konaba media ho eleisaun.
Iha aniversáriu AJTL ne’e, Prezidente Konsellu Imprensa hateten ohin loron espesiál, tanba monu los iha loron 22 Dezembru 2021, AJTL halo tinan ba 22 anos. Entaun responsabilidade ne’ebe mak fo atu ko’alia mak oinsa media nia Independénsia perante iha Eleisaun Prezidensiál no Parlamentár.
“Ha’u nia fokus ko’alia sei la lori buat foun, maibe atu fo hanoin fila fali de’it ba membru AJTL katak durante tinan 22 resin liu ba, fundadór sira ne’ebe hola parte iha hotel Turizmu, tau hanesan misaun no vizaun jerál AJTL nian, mak kombate intervensaun polítika, intervensaun ekonomia iha sala redasaun, ida ne’e maka fuan husi independénsia editoriál, bainhira jornalista hatene evita ema seluk nia intervensaun ba ninia serbisu, no nia indepedénsia ne’e sai hanesan xave ba indepedénsia editoriál,” Dehan Prezidente KI ba Jornalista sira iha Hotel Luz Clarita, 22/12.
Prezidente hatutan tenke rekoñese katak jurnalizmu ne’e profisaun ida ne’ebe nakonu ho diverjénsia, tanba ida ne’e natureza husi profisaun ida ne’ebe lor-loron halo kobertura kona-ba diferensa opiniaun iha públiku, importante mak esforsu hotu diferensa, atu lori solusaun rezolve problema ruma.
Prezidente KI haktuir ezistensia organizasaun ne’ebe barak ne’e diak liu, tanba bele aumenta ita nia forsa, tanba se ida de’it ema dehan kabas rua ne’e la to’o, maibe kabas barak di’ak liu, tanba bele hulan lesuk todan ne’ebe mak iha. Agora kestaun mak ita nia solidariedade ne’e di’ak ka lae.
