Reportajen Joselina dos Santos
Relasiona ho desizaun Primeiru Ministru, Taur Matan Ruak ne’ebé deside atu fó subsídiu $25.00 ba funsionáriu Públiku sira, nune’e akademista Julio Aparicio ba jornalista sira deklara katak governu tenke tau prioridade uluk ba ema kbiit laek sira no komunidade sira ne’ebe sei hela iha sentru evakuasaun ka lona okos, antes fo subsidiu ba funsionáriu sira.
Julio Aparicio hateten Governu fo subsídiu ba funsionáriu públiku sira ne’e, tenke iha razaun ne’ebé forte ho desizaun ne’ebé Governu deside tenke justu katak, funsionáriu Públiku sira hetan Subsídiu husi governu tanba sá, no oinsá ho povu bain-bain ne’e hetan ka la’e.
“Durante Pandemia Covid-19 iha tinan 2020 Governu fo uluk subsidiu ba ema hotu, maibé ema sira ne’ebé salariu $500 ba leten labele simu, $500 ba kraik mak bele simu ne’e justu ba ema hotu, maibé ba ha’u povu barak mak halerik”, dehan Julio Aparicio ba Neon Metin iha nia kna’ar fatin Kampus FCS Kaikoli, 24/09.
Akademista ne’e hatutan Funsionariu Públiku iha direitu atu hetan subsidiu maibe Governu halo ida ne’e ballansu ka la’e ne’e mak importante.
Observadór ne’e konfesa ba Neon Metin katak Ko’alia kona-ba funsionáriu mos iha nivel ne’ebé lahanesan balun nivel 1 to’o 7 depois iha karreira espesiál. Governu tenke justifika no halo kritériu ida ba ema hotu, no mos ba povu bain-bain.
Julio konklui katak orgullu ho Governu nia programa hirak ne’e, maibé governu tenke halo buat ne’ebé justu ba sidadaun hotu iha rai ida ne’e. Nia husu ba VIII Governu hatudu ninia obra ida ba rai ida ne’e, Governu tenke halo programa ne’ebé justu no balansu atu nune’e ema hotu sente katak laiha diskriminasaun.
