Reportajen Francisco JDA
Centro Nasionál Chega (CNC) asina akordu kooperasaun ho Asosiasaun Vítima hodi apoiu harii uma ba sobrevivente ne’ebé too oras ne’e vulneravel liu hosi situasaun funu to’o ukun-an, nune’e uma ne’e hanaran Uma Husi Memória Ba Esperansa dedika ba sobrevivente vítima sira ne’ebé mak mai husi konflitu pasadu Timor nian
Diretór Ezekutivu Centro Nasionál Chega, Hugo Maria Fernandes ba jornalista sira hateten, ba servisu ida ne’e CNC sei halo transferénsia orsamentu ba Asosiasaun Vítima hodi harii uma 11 ba sobrevivente vitima sira ne’ebé Asosiasaun Vítima identifika no hala’o verifikasaun tiha ona iha territóriu laran.
“Orsamentu ne’ebé aloka hamutuk $169 mill hodi harii uma 11 ho nia kritériu mak uma ne’e tenei harii iha rai sobrevivente ninia rasik no hare katak sobrevivente nia kondisaun vulneravel duni, ida ne’e mai foin halo uma ba sira,” hatete Diretór CNC, Hugo Maria Fernandes iha salaun CNC, 24/09
Iha fatin hanesan Koordenadór Ezekutivu Sekretariadu Nasionál Asosiasaun Vítima, Domingos Pinto hateten fatin identifikasaun atu halo uma ba sobrevivente vítima sira mak iha Lospalos, Viqueque, Ainaru, Suai, Dili no Likisá no munisípiu seluk ne’e sei iha faze verifikasaun uma no sei ho medida 7×9, maibé uma ida mak diferente tanba rai la favorese entaun nia medida iha 5×6 de’it.
“Kualidade tenke garante, tanba antes hahú implementasaun iha foin daudaun ne’e ekipa halo koordenasaun ho xefe suku sira no entidade sira para atu koopera la selu ema barak, maibé selu mak badaen listrik de’it” hatete Domingos Pinto.
