Reportajen Agustinha Amaral
Vise Federasaun Kempo Timor-Leste, Francisco Amaral da Silva, hatete, agora dadaun Federasaun Shorinji Kempo Timor-Leste (FSKTL) kria ona lasu amizade entre Kempo iha rai laran no mos nasaun seluk.
“Iha momentu ida ne’e ami hakarak ko’alia konaba Federasaun husi Kempo nian ne’ebe mak selebra espozisaun ona ho objetivu atu kria amizade no lasu amizade ho pas entre Shorinji Kempo iha rai laran no mos Shorinji Kempo husi nasaun sira seluk,” hateten Vise Federasaun SKTL ba jornalista iha salaun Universidade da Paz, sábado, 29/07.
Tanba ne’e mak ohin loron marka prezensa, vizita kortezia ida ne’e husi Japaun nian ho objetivu ida oinsá atu bele hasa’e kapasidade husi parte sira nian ne’ebe mak oras ne’e iha Timor atu prepara sira nia aan atu tuir kompetisaun ba iha nivel nasional, rejional no mos nivel international.
“Tuir planu sei tau iha ami nia kalendariu anual husi organizasaun husi Kempo nian, aktividade organizasaun Kempo nian tuir estabelesimentu Federasaun Kempo nian,” nia esplika.
Aktividade treinu oras ne’e dadaun estabelese ona iha munisípiu lima hanesan Baucau, Lautem, Lospalos, Dili, Bobonaro, Maliana no Ermera, aktividade seluk ne’ebe iha nu’udar treinador masimu Timor Leste nian.
“Atu organiza di’ak liu tan sira oinsa atu prepara sira nia aan atu sai atleta ou atleta ne’ebe di’ak atu prepara hodi forma sira nia mentalidade di’ak atu labele kria problema no labele hola parte iha problema saída de’it atu la prejudika ba iha sira nia futuru,” tenik nia.
Iha fatin hanesan, Prezidente Confederação Desporto Timor-Leste (CDTL), Macario Sanches informa, Federasaun Shorinji Kempo Timor-Leste hatudu tan dala ida atu nune’e hahu promove federasaun no hahu promove aktividade desportivu, ida ne’e mak ita sempre husu ba federasaun hotu-hotu banati tuir.
“Sira tenki ba iha públiku ba universitariu no eskola sira atu promove modalidade liuhusi meus ida ne’e mak joven sira bele koñese no koñese ona atu bele partensi ba organizasaun ida ne’e,” nia esplika.
Tanba Shorinji Kempo hanorin la’os de’it ba tékniku, maibé oinsá promove oan no alin sira atu mai iha ne’e no husu ba povu Timor tomak ne’ebe hakarak aprende Shorinji Kempo nu’udar kultura Japonés nian agora existi iha ne’e bele hakbesik mai atu nune’e bele aprende di’ak liu tan tékniku no mental atu nune’e bele aumenta tan saúde mais saudável.
