Reportajen Adalgisa Pereira
Iha komemorasaun aniversáriu Asosiasaun Jornalista Timor Lorosa’e (AJTL) ba dala 22 ho tema “Indepedensia Editorial Iha Kontestu Eleisaun no Feto Iha Karreira ” iha abertura Prezidente Konsellu Imprensa, Virgílio Guterres husu membru AJTL hotu, atu serbisu tuir nia konxiénsia profisionál no labele depende liu ba konvite
“AJTL tenke fó hatene ba nia membru jornalista, tenke servisu tuir ninia konxiénsia profisionál katak ninia sensibilidade ba sosiedade tenke makaas iha asuntu ne’ebe mak iha interese públiku, no mos jornalista kobertura labele depende liu ba konvite governu ka ONG konvida mak foin halo kobertura,” dehan Prezidente KI, Virgílio Guterres iha hotel Luz Clarita, 22/12
Nia hatutan iha tinan 22 liu ba kotuk, AJTL luta iha buat rua mak luta liberdade imprensa no luta kontra intervensaun polítika no intervensaun ekonómika iha sala redasaun, no nafatin kontinua luta, no xave iha jornalista ida-idak.
Nia enkoraja AJTL atu iha kometimentu involve iha luta aspetu hotu hanesan liberdade imprensa, igualdade jéneru, kombate desinformasaun, seguransa internet, ida ne’e hatudu AJTL ninia maturidade no mos ninia preokupasaun no kompromisiu ba sosiedade ida ne’ebe mak livre no sosiedade ne’ebe mútua respeitu.
Iha fatin hanesan Prezidente AJTL, Zevonia Vieira aprezenta relatóriu atividade ne’ebé mak durante ne’e AJTL halo hanesan fo formasaun ba membru AJTL, estudante komunikasaun sosiál husi universitáriu no rádiu komunidade sira hanesan Ddgital literacy, kombate disinformasaun, media no meiu ambiente, jornalizmu síviku, editor club, diskusaun nakloke no atividade ho organizasaun sosiedade sivíl relasiona ho liberdade imprensa no espresaun.
AJTL mos serbisu ho Oxfam iha Timor-Leste, halo media tour ba jornalista sira, lori sira ba area rural hodi halo kobertura konaba agrikultór sira nia situasaun ne’ebe la asesu merkadu no estrada aat.
Prezidente AJTL informa durante ne’e AJTL hetan apoiu másimu UNDP, UNESCO, Embaixada Amerika, Universidade Malaya, Konsellu Imprensa, Oxfam iha Timor-Leste hodi halo serbisu importante sira, hodi dezenvolve media iha Timor-Leste.
AJTL husu ba membru sira tomak katak presiza tau konsiderasaun iha asuntu sosial sira konaba violasaun hasoru feto no labarik feto, defisiénsia, feto iha area rural no grupu LGBTI, tanba sira iha direitu atu hato’o sira nia lian
Nia hatutan AJTL iha Nia prinsipiu atu sai ativista luta ba direitus umanus no violasaun sexual hasoru vuneravel sira membru AJTL sira iha konsensia komitmentu hodi luta kontra violasaun sexual hasoru feto no labarik.
Zevonia konklui katak AJTL iha konxiénsia katak hakarak promove jornalizmu inkluzivu iha Timor-Leste
