Reporatjen Joselina Dos Santos
Movimentu Kontra Okupasaun Tasi Timor (MKOTT), Hamutuk ho Komite Popular realiza Missa Requem ba matebian Shirley Shackleton, hodi fó solidariedade tanba durante saudoza Shirley fo nia kontribuisaun, no apoiu ba luta Timor no mós kontra governu Australia, iha prosesu deside liña fronteira marítima.
“Ohin ita akompaña kamarada Shirley Shackleton ne’ebe nu’udar kaben hosi Greg Shackleton hanesan jornalista ida hamutuk ho nia maluk nain ha’at, hetan asasinasaun hosi militár Indonesia iha loron 16 Outubru 1975 iha Postu-Administrativu Balibo Munisipiu Bobonaro, nune’e Iha loron 15 Janeiru 2023 Shirley Shackleton husik hela mundu ho idade 92 anos”, dehan Reprezentante Komite Popular Sisto dos Santos, hafoin kari ai-funan iha Igreja Motael, Kinta 19/01.
Diretór Ezekutivu Asosiasaun Hak ne’e dehan Povu Timor-Leste lakon tan ona Inan no belun diak ida dezde iha 1975 to’o 1999, proativamente apoiu luta solidariedade ba Timor-Leste nia autodeterminasaun, no mós halo esforsu bo’ot ida atu governu Australia halo Investigasaun ba akontese ne’ebe akontese iha Balibo tinan 1975, Iha 2015 Shirley Shackleton publika nia livru, no buka lia- ho hanoin ida katak, komunidade International la bele taka matan, ba krime grave no krime kontra umanidade hasoru Jornalista nain 5, maibé mós ba povu Timor durante okupasaun ilegal militár Indonesia iha Timor-Leste.
“ita selebra misa hamutuk ho Pe. Juvito, Provedór Direitus Umanus no Justisa (PDHJ), Komandate PNTL, Diretór Ezekutivu CNC, reprezentante Embaixada Australia, Jornalista, Estudante, akademista ho ativista sira, hamutuk hodi fó omenajen ikus ba matebian Shirley Shackleton ne’ebé lakon iha mundu, ita konkretiza aktu solidariedade atu kesi metin solidariedade entre povu Timor-Leste ho Povu Australia”, Nia informa.
Relasiona ba omenajen Matebian Shirley Shackleton ne’e, Movimentu Kontra Okupasaun Tasi Timor, hamutuk ho Komité Popular konvida membru Governu ho Prezidente Repúblika, maibé sei okupadu hela maibé sira sei la lakon korajen ba ema hotu atu kontinua fó informa ba malu.
