Reportajen Joselina Dos Santos
Governu liuhosi Sekretáriu Juventude no Desportu (SEJD), halo sosializasaun konaba fundu apoiu Organizasaun Arte Marsiais (OAM), ho orsamentu $2.5 Milhões. Fundu ida ne’e hodi hadiak Jestaun OAM, resensiamentu ba membru, Formasaun ba treinador sira, kompetisaun no harii sede OAM
Hafoin enkontru, Prezidente Komisaun Reguladora Arte Marsiais (KRAM), Fernando Antonio da Costa “Lekinawa” hatete, orsamentu $2.5 milhões ba organizasaun hamutuk 18, husi organizasaun sira ne’e, organizasaun balun federative, ezemplu federasaun hanesan Taekwondo, Silat no Karate, maibé organizasaun seluk ne’e organizasaun bain-bain ne’ebe hola parte iha federasaun.
“Organizasaun arte marsiál hotu sei hetan fundu bazeia ba total númeru membru nian, no mos bazeia ba kompleksidade organizasaun nian. Organizasaun kik ho membru uituan sei hetan osan menus, no organizasaun ho membru barak liu sei hetan fundu boot liu”, dehan Prezidente KRAM iha SEJD, 30/01
Nia haktuir, totál orsamentu boot liu ba organizasaun mak $300 mill resin, no orsamentu ki’ik ne’e ho total $70 mill resin, depois sede ne’e komponente ida de’it husi osan $2.5 milhões.
Hatan ba perguntas kona ba apoio fundo ba harii sede OAM nian, Presidente KRAM esplika katak antes too ba harii sede presija hahu uluk hadiak jestaun OAM nian, depois halo resensiamentu ba membru OAM ida-idak nian, kontinua ho formasaun ba treinadór, apoio ba organiza kompetisaun, no depois mak apoio ba harii ka hadiak sede OAM nian. Maibe harii sede ka hadiak sede ne’e sei tetu ho asuntu sira liga ho legalidade rai no propriedade nian.
