Reportajen Santina Lucia da Costa
Sekretáriu Estadu Juventude no Desportu (SEJD) hamutuk ho Komisaun Organizadór ba Komemorasaun Loron Nasional Juventude no Masakre Santa Cruz 12 Novembru 1991, konvida Prezidente Repúblika, Dr. Francisco Guterres Lu Olo, hodi partisipa no prezide serimónia komemorasaun loron Nasionál Juventude no Masakre Santa Cruz.
“Sekretáriu Estadu Juventude no Desportu (SEJD) hamutuk ho organizasaun joven sira mai konvida Prezidente Republika, atu partisipa iha selebrasaun Juventude Santa Cruz nian iha loron 12 Novembru. Mai ho Objetivu atu informa programa sira ne’ebé mak iha no konvida Prezidente Republika hodi prezidi iha selebrasaun 12 Novembru iha Santa Cruz.” Hateten SEJD, Abrão Saldanha “Nokosiku hafoin audiénsia, ho Xefe Estadu, iha Palásiu Prezidensiál, Nicolau Lobato, Bairu-Pite, 10/11.
Abrão Saldanha dehan Prezidente Repúblika aseita no disponivel prezide no Prezidente Republika konfirma sei halo mensajen simboliza selebrasaun iha loron 12 Novembru.
Tema ba komemorasaun Loron Nasionál Juventude ba dala-16 no Masakre Santa Cruz ba dala-30 maka, “Espiritu As’wain 12 Novembru nian, Joven hanesan Autór importante ida ba Proteze Timor-Leste husi Covid-19.”
Abrão Saldanha dehan iha reflesaun dezde 27 Outubru kalan iha Motael, ba Saudozu Sebastiao Gomes nia mate, 11 Novembru sei iha reflesaun iha Santa Cruz, selebrasaun kulminante iha 12 Novembru, hanesan baibain halo misa iha Motael, depois halo marsa ba semitériu Santu Cruz.
Selebrasaun ne’e ita halo atividade sira hanesan, Kompetisõens, drum band, múzika, diskursu, konsertu, iha mós kampaña Vasinasaun iha Postu-Administrativu sira no selebra mós iha Munisipiu sira seluk, organizasaun juventude no sentru juventude sira munisípiu sira no orsamentu ba selebrasaun ba masakre Santa Cruz hamutuk $40 resin milõens.
