Reportajen Umbelina dos Reis
Timoroan sira ne’ebé servisu iha Austrália no fila mai Timor, identifika katak kuaze ema 1500 (rihun ida atus lima) halo uma iha Timor, liu hosi programa partisipa laboral, ne’e hatudu katak ekonomia iha mudansa duni”. Diretor Jeral SEFOPE
Sekretáriu Estadu Formasaun Professional no Empregu (SEFOPE), liu hosi Diresaun Nasionál Empregu Exterior (DNEE), realiza Workshop ba Programa Pacific Labor Facility (PLF), hodi ko’alia konaba hasa’e kreximentu ekonomia iha Timor-Leste, no feto nia partisipasaun konaba programa mobilidade laboral, nune’e feto tenke partisipa masimu iha Programa mobilidade refere.
Diretór Jerál SEFOPE, Paulo Dias hateten workshop ne’e organiza hosi DNEE ba Programa Pasific Labor Facility (PLF), ho atividade fó formasaun ba Diretór Sentru Formasaun no liña ministerial sira ne’ebé mak relevante.
“Atividade tolu refere ko’alia konaba partisipasaun feto konaba programa mobilidade laboral, nune’e hasa’e taxa partisipasaun feto nian hodi nune’e feto mós tenki partisipasaun maximu iha programa mobilidade laboral nian. Segundu ko’alia konaba benifísiu ekonomia mai Timor-Leste, terseiru ko’alia konaba reintegrasaun, ne’e polítika ne’ebé ke importante tebes,” dehan Diretor Paulo.
Nia dehan workshop loron tolu ne’e importante tebes ba funsionáriu sira iha SEFOPE no sentru formasaun sira, nune’e saida mak halo kontribui ba joven feto sira ne’ebé partisipa iha programa refere.
“Tinan 2012 altura ne’eba programa partisipasaun feto iha Timor la’o di’ak, kuaze 45 %, depois muda tia programa ne’e PLS, PALM entaun ko’alia konaba polítika foun entaun partisipasaun feto 29% ba traballadór ne’ebé servisu iha Austrália,” dehan Diretór Jerál Paulo ba Jornalista sira iha Salaun Suai Room, Timor Plaza Tersa-feira 21/02.
Nia informa katak, sira halo peskiza ba Timoroan sira ne’ebé servisu iha Austrália no fila mai Timor, identifika katak kuaze ema 1500 (rihun ida atus lima) halo uma iha Timor, liu hosi programa partisipa laboral, ne’e hatudu katak ekonomia iha mudansa duni.
Nia dehan, agora da-dauk halo planu ba Departamentu Merkadu Traballu, nune’e halo peskiza ba traballadór sira ne’ebé ba servisu iha Korea Sul no Austrália, ne’ebé servisu remata ona, da-dauk ne’e hela iha ne’ebé no halo saida?
Iha fatin hanesan Diretór DNEE, Filomeno Soares, informa, katak dadus hosi vaga foun tinan 2022 nian, mobilidade ba Korea Sul nian ema 1160 kompara boot liu kompara ho tinan hirak liu ba. Traballadór Austrália kuaze 3000 mak manda ba Austrália, da-dauk ne’e iha hela Sistema, tuir selesaun lista sistema ne’ebé halo entre munisípiu 12 inklui RAEOA. Dadus total iha sistema hamutuk 15 mil, maibé konsege mobiliza ona traballadór 4 mil ba servisu iha Austrália. Maibé konaba mobilidade entaun hahú hosi 2012 – 2022 kuaze hosi traballadór ne’ebé mak hetan oportunidade ba dala rua ou dala tolu.
“Tanba Austrália aplika vaga servisu ba traballadór sira kuaze 7 mil, mak tama ona ba servisu iha Autrália signifika katak ema ida bele hetan oportunidade ba dala rua mak ko’alia aplikasaun ba ida ne’e, traballadór ne’ebé mak sei existe iha Austrália kuaze 4 mil mak sei servisu iha ne’eba,” dehan Diretór DNEE.
