Reportajen David da Costa
Prezidente Republika (PR), Dr.José Ramos-Horta fiar katak iha eleisaun Parlamentár tinan ida ne’e garante 100% la’o ho di’ak. Nune’e Xefe Estadu fiar partidu politiku sira ne’ebé rejistu ona iha Tribunál Rekurusu, sei partisipa ativu iha eleisaun Parlamentár 2023.
Prezidente Republika (PR), José Ramos-Horta, hateten partidu politiku sira sei konsentra ba ida-idak nia programa no buka sai ba povu, hodi hato’o sira nia informasaun kona-ba politika programa partidu ida-idak nian iha tinan lima mai ne’e ba povu, tanba ne’e partidu ne’ebé nia programa di’ak sei hetan povu nia votus.
“Ha’u fiar katak iha loron 21 Maiu buat hotu sei la’o di’ak 100%, laiha probelma no tekniku CNE no STAE sei garante ida ne’e. Ha’u fiar partidu politiku sira sei partisipa ativamente, sei konsentra ba ida-idak buka sai ba povu informasaun kona-ba programa politika partidu nian iha tinan lima mai ne’e,” dehan Prezidente Ramos-Horta, bainhira sai oradór iha Simpóziu Nasionál Hametin demokrasia paz no estabilidade konstrusaun estadu iha Salaun Laline Larigutu CNE, Tersa 28/02.
Nia haktuir, partidu politiku sira hakarak kritika malu, insulta malu, ko’alia barak liu kona-ba kotuk, maibe konsentra ba iha tinan lima mai ne’e, partidu tenke halo ida ne’ebé di’ak para hadi’a povu nia moris.
“Ha’u hatene ita nia FFDTL, sira sei kontinua garante paz no estabilidade orden publika, ne’e duni iha elisaun sei la’o di’ak no ha’u fiar ita nia adezaun ba ASEAN garantidu laiha problema,” tenik nia.
Tanba ne’e, Timor nia naran sei sai kontinua iha mundu, no governu ne’ebé mai, povu maka sei deside, Prezidente maka depois fó fose, tuir konstituisaun no tuir pratika Timor nian ne’ebé maka iha. Nune’e mós governu foun mai Prezidente sei fasilita atu nune’e bele halo sira nia servisu ho di’ak.
“Iha 20 Maiu 2022, ha’u buka sempre fasilita tane governu nia servisu, tanba papel prezidente nian la’os atu sai obstákulu ba governu. maibé ha’u sempre buka iha tinan ida nia laran, tane Governu para nia bele ezekuta nia tarefa. Ba ohin ha’u sei kontinua ida ne’e,” nia esplika.
Enkuantu Partidu Politiku sira ne’ebé konfirmadu husi Tribunal Rekursu (TR), atu kompete iha Eleisaun Parlamentár tinan 2023 ne’e hamutuk 24 mak hanesan Partidu CNRT, FRETILIN, KHUNTO, PLP, PD, Frente Mudansa, ASDT, APMT, PST, UNDERTIM, PDC, PEP, PDP, PR, UDT, MLPM, PUDD, PTD, PSD, CASDT, PDN, PMD, PLPA, PDRR no OS VERDES.
