Reportajen Silvino Freitas
Ospitál Nasionál Guido Valadares (HNGV) estabelese edifísiu foun sentru Onkolojia nian, atu halo tratamentu ba moras kankru no evita ba tratamentu iha liur, no daudaun ne’e progresu atinje ona 50%.
Diretór HNGV Alito Soares hateten, reabilitasaun edifísiu foun ne’e prepara ba iha sentru onkolojia nian, sentru ne’ebé atu halo konsulta ba moras kankru nian, atu bele evita tratamentu moras kankru iha estranjeiru.
“Tempu badak sei remata tanba daudaun ne’e tuir relatóriu atinji ona 50% ba leten, kuandu remata pasiente sira ne’ebé tratamentu ba kankru bele halo iha ne’e de’it, hirak ne’ebé kompleksu mak bele ba rai-liur” dehan Diretór HNGV Alito Soares, (10/03).
Nia dehan, ekipa ne’ebé lidéra iha sentru ne’e maka specialista kankru doutora nain 2 inklui espesialista ida husi Cuba, no mós nafatin servisu hamutuk ho parseiru sira, bainhira edifísiu remata sei halo kompra ba ekipamentu sira balun, kona-ba fatin-rai, mistura no utiliza ba ai-moruk sira kankru nian.
“Iha mós forma ekipa ida ne’ebé sei halo servisu kona-ba ida ne’e sira foin fila husi Jakarta ba halo treinamentu iha ne’ebá no sira iha ona kondisaun para halo servisu sira ne’e, nune’e ita hein mak edifísiu ne’e” nia esplika.
Entretantu orsamentu ba edifísiu inklui ekipamentu sira ne’e mai husi Ministeriu Saúde ho totál $49.000.
