Reportajen David da Costa
Assosiaun Hak realiza treinamentu oinsa optimaliza kbiit Lideransa, Psikososiál ho komunikasaun efetivu ba Guarda Prizionál husi Prizaun Gleno no Prizaun Becora hamutuk 35, atu nune’e aumenta koñesimentu Guarda Prizionál sira bainhira halo komunikasaun ne’ebé diak ho prizioneiru sira.
Diretór Ezekutivu Assosiasaun HAK, Feliciano da Costa Araújo hateten Guarda prizionál sira ne’e hasoru prizioneiru sira barak, dala-barak prizioneiru sira ne’e mai ho karakter ne’ebé la hanesan, tanba ne’e maka HAK halo treinamentu, atu kapasita Guarda Prizionál sira, liuliu liga ba iha lideransa, psikososiál ho komunikasaun ne’ebé maka efetivu entre prizioneiru ho Guarda Prizionál.
“Tanba atu grante sira iha komunikasaun ho diak, nu’udar lideransa iha prizaun ida, sira bele hatene ona oinsá atu komunika ho prezu sira,” dehan Diretór Ezekutivu Assosiasaun HAK, Feliciano da Costa, iha JL Vila Ai-mutin, Sesta 14/04.
Nia haktuir prizioneiru sira ne’e la’os karater ne’ebé la diak, maibé sira kumpre ba aktu ne’ebé maka sira halo, oinsá maka atu kontinua hadia sira nia hahalok, depois fila fali mai iha sosiedade para atu kontinua kontribui ba iha dezenvolvimentu.
“Hau hanoin depois de formasaun ida ne’e hotu labele monu let deit, maibé sira bele lori implementa iha realidade ka tau iha asaun konkreta,” nia espetativa.
Iha fatin hanesan Guarda Prizionál, Luzinda Menezes Madeira haktuir programa ida ne’e diak tebes, atu kapasti Guarda Prizionál sira. Maski Guarda Prizionál balun servisu kelur ona iha prizaun, maibé kapasitasaun kona-ba formasaun sira hanesan importante tebes ba Guarda prizionál sira, tanba loron ba loron hasoru prizioneiru sira ne’ebé mai ho kazu la hanesan no avansadu tebes.
“Hau sente kontente tanba bele mai partisipa iha formasaun ida ne’e, tanba ida ne’e melora diak liu tan ami nia servisu hodi atende prezu sira, tanba iha ami nia servisu ne’e atende ema prizioneiru ne’ebé ho karakter ne’ebé la hanesan no kazu ne’ebé la hanesan. Hanesan Guarda Prizionál ami presiza tebes formasaun sira hanesan ne’e, atu nune’e fanu fila fali ami, atu haree didiak fali ami nia papel servisu nian iha prizaun rasik katak ami la halo diskrimisaun ba sira, ami haree sira mai laos hanesan dadur hanesan ema, tanba sira mos iha direitu,” nia dehan.
Entertantu iha Workshop kona-ba optimaliza kbiit Lideransa, psikososiál ho komunikasaun efetivu ba iha Guarda Prizionál, haree husi oklu Direitu Umanus ne’e partisipa husi Gurada Prizionál husi Prizaun Gleno no Prizaun Becora hamutuk 35.
Alende ne’e mós partisipa husi Diretór Ezekutivu Servisu Apoiu Sosiedade Sivil no Auditoriu sosial (SASCAS) Edwin Duarte Soares Noronha no reprezentante Diresaun Nasionál Servisu Prizionál Reinsersaun sosiál Augusto Humberto dos Reis.
