Reportajen Zevonia Vieira
Partidu Frente Revolucionaria de Timor-Leste Independente (FRETILIN), Partidu Libertasaun Popular (PLP)no partidu Kmanek Haburas Unidade Nasional Timor Oan (KHUNTO) asina ona plataforma tolu hodi haburas liután ba programa sira ne’ebe VIII governu hala’o ona no oinsá hametin liu iha eleisaun parlamentár 2023.
Iha loron seremonia asinatura kompromisu pre-eletoral plataforma partidu tolu nian, Sekretariu Jeral Partidu FRETILIN no nu’udar Koordenador Plataforma, Dr. Mari Alkatiri hateten iha konviksaun boot katak plataforma ida ne’e sei kontinua boot, metin, buras liután no sei habelar liután.
Nune’e nia dehan bainhira atu konsilida plataforma refere, presiza serbisu makaas hodi hare liu ba kada programa ne’ebe kada partidu sei hato’o iha kampaña eleitorál, tanba idak-idak ho nia eleitorál rasik
“Saida mak ita presiza hahú ohin mak kontinuadadi ezersísiu governasaun iha Timor ne’e, so bele garante bainhira hare ba programa. Hau fiar katak povu mos komprende ida ne’e, katak tinan 2 to’o tinan 3 ne’e konsege ezekuta programa oin-oin iha tempu ne’ebe la fasil hasoru pandemia, hasoru dezastre naturais mais konsege ezekuta duni programa oin-oin. Biar nune’e rezultadu ema hotu nian”, dehan Dr.Mari Alkatiri iha Salaun Tower Fatuhada, 15/04.
Nia reafirma katak asuntu importante ne’ebe sedauk konsege halo mak konaba afirmadu do estadu ho instituisaun másimu, “nonu governu tenke halo esforsu tomak, para afirma do estadu konaba vida kulturál, vida institutional. Se ita la afirma estadu ne’e, se ema balun sente katak sira iha estadu nia leten nafatin, rai ne’e sei la lao ba oin. Estadu tenke afirma, hametin nia vida no kultura rasik para ita bele mehi atu harii nasaun, se ita la mehi harii nasaun signifika katak povu sei moris iha marginalidade”.
Eiz Primeiru Ministru ne’e fo hanoin katak asuntu importane seluk mak kria plataforma ne’ebe bele tau Timor-Leste hanesan país global, ida mak sai membru ASEAN no CPLP ne’ebe bele koloka Timor iha mundu.
Bainhira jornalista Neon Metin halo konfirmasaun konaba Partidu ho ninia manifesto idak-idak, oinsá mak bele entegra manisfeto hirak ne’e ba plataforma ida?
Ba Neon Metin Mari Alkatiri hateten program bele idak-idak, maibé iha koordenasaun antes para kestaun fundamental ne’ebe konsensual ne’e mantein ho program tolu.
Tuir nia sai fundamental liu iha plataforma ne’e mak iha afirmasaun de direitu demokrátiku, estadu hanesan instituisaun iha ninia vida ho nia kultura institusionál propiu, para atu labele akontese partidu iha estadu nia leten, ou sidadaun balun sente katak sira iha estadu nia leten.
