Reportajen Zevonia Vieira
Partidu Unidade Dezenvolvimentu Demokratiku (PUDD) iha nia kampaña polítika ne’ebe halao iha munisípiu Baucau, ba militante no simpatizante sira, Prezidente PUDD, Silvestre Xavier Sufa hato’o programa prioridade PUDD nian, ne’ebe hakarak tau atensaun ba juventude.
Iha kampanha eleitorál Prezidente PUDD hateten PUDD nu’udar partidu jerasaun foun, nune’e foka ba juventude sai fatór importante tebes, tanba joven sira ho idade produtivu sei kontribui ba dezenvolvimentu nasaun ne’ebe diak liu.
“ita nia programa prioridade mak tau atensaun ba juventude sira, bainhira PUDD ukun sei halo kompetisaun barak liu, halo programa desportu ba joven sira, módika joven atu nune labele vacuum (pasif) iha nia bairo, joven bele kontente hodi nune labele involve an iha krime, maibe hanoin mak dezenvolvimentu nasionál, ida ne’e sai prinsipal”, dehan Prezidente PUDD iha Baucau, 23/04.
Nia hatutan programa Kooperativa sai mos programa ne’ebe importante ba joven sira nia nesedidade, oinsa fo kréditu ba joven sira, nune’e sira bele pro ativu hodi produs programa k negósiu ne’ebe mak bele fo vantajen sira ba nia an.
Nia mos hateten kontinua fo apoiu joven sira ne’ebe agora dadauk hala’o serbisu iha rai estranjeiru, nune’e bainhira fila, PUDD Kontinua apoiu sira oinsa sai entrepreneur ka pengusaha, nune’e sira mos bele fo oportunidade ba joven sira seluk atu bele hetan serbisu.
“Tenke suporta sira nafatin liuhusi kréditu, tanba Joven produtivu tenke ukun tanba nia serbisu makaas”, dehan Silvestre
Prezidente mos atu joven no militante PUDD Sira kontinua moris unidade no hakmatek iha komunidade nia leet
PUDD ho nia númeru sorteiu 8 ne’e mos fo hanoin ba militante no simpatizante sira ne’ebe partisipa iha kampaña komísiu ne’e, atu kontinua moris unidade no hakmatek iha komunidade leet, no ses an husi violénsia no konflitu.
