Reportajen David da Costa Gusmao
Diretór Kampaña Jose Manuel Nakfila, hodi apoiu kandidatu Prezidente Republika, Dr. Francisco Guterres Lu Olo, dehan kandidatu Lu Olo hatene hodi hapara krize mundial ne’ebe maka Timor hasoru, no la halo povu mate barak liu hanesan iha rai seluk. Ho ida ne’e mai hamutuk hodi hili Lu Olo lori nia ba iha Aitarak laran, no hodi bele lori dezenvolvimentu no mudansa mai Timor-Leste.
“Ita hili Lu Olo, ita lori nia ba Aitarak laran, dezenvolvimentu maka sei mai, mudansa mak sei mai atu hatutan ita nia moris hamutuk ho ezekutivu ne’ebe mak forte,” Dehan Diretór Kampaña Jose Manuel Nakfilak bainhira Hala’o Komisiu iha Tasi Tolu, Domingu 10/04.
Nia haktuir Kandidatu ida ne’ebé maka kria estabilidade, ne’ebe hatene rona ema, ne’ebe hatene promove diálogu entre orgaun estadu hotu, no kandidatu ne’ebe fó biban ba governu atu hala’o nia programa ba dezenvolvimentu ba povu, no nasaun ida ne’e maka kandidatu Francisco Guterres Lú Olo.
Kandidatu Lu Olo kandidatu ida ne’ebe hateten nia an tomak, katak nia so hatene no hakruk ba konstituisaun, ba konxiénsia no leis ne’ebé iha, nia sei la hakru’uk ba poder informal sira ne’ebe mai husi liur para atu orienta deit
“Kandidatu Francisco Guterres Lú Olo, nia la rona ba ema ida, maibe nia rona ba konstituisaun, rona ba nia konsensia no lao tuir lei ne’ebé maka vigora iha ita nian rai ida ne’e,” Hateten Nakfilak.
Ho ida ne’e mai hamutuk hodi lori kandidatu prezidente Francisco Guterres Lú Olo, lori nia dala ida tan hodi ba tuir iha Aitrak laran, tanba nia konsege ultrapasa impase politika sira iha Timor ho dame no estabilidade.
