Home Notisia Manorin Voluntáriu nia Lian Ba Kandidatu PR, Komunika Ho Governu Hare Sira...

Manorin Voluntáriu nia Lian Ba Kandidatu PR, Komunika Ho Governu Hare Sira nia Kontratu

1110
0
Manorin sira iha Daralau. [Foto: David | 12.04.2022]

Reportajen David da Costa Gusmao

Profesór ka manorin voluntáriu iha eskola Ensinu Basiku Centarl (EBC) 123 Darlau, iha suku Becora postu adminitrativu Kristu Rei Munisípiu Dili, hato’o sira nia esperansa ba kandidatu Prezidente Republika ne’ebé maka eleitu tenke influensia governu, hodi tau matan ba profesór voluntáriu sira, tanba professor sira mós kontribui ba nasaun liuhusi edukasaun.

Vicente Mendonça Ximenes hanesan professor voluntáriu iha eskola Ensinu Basiku Central (EBC) 123 Darlau, ba neon metin hateten katak, nia hanorin iha eskola EBC 123 Darlau tinan hitu ona, maibe laiha governu ida maka kontratu, ho ida ne’e nia sente triste, tinan hitu ona hanorin estudant sira hodi kontribui ona ba iha estadu maibe realidade ne’ebé iha seidauk hetan kontratu hosi governu.

“Ami nia problema ne’ebé ami hasoru iha EBC 123 Darlau, ami nu’udar ema volontariu iha ne’e tinan hitu ona, mas seidauk hetan kontratu ruma husi governu. Tanba ne’e ami ezije ba governu liuliu ba iha Ministeriu Edukasaun no Juventude e Desportu (MEJD) atu bele tau matan hela mai ami nia prekupasaun sira ne’ebé ami hasoru hela ne’e,” Vicente hateten ba neon metin iha eskola EBC 123 Darlau, suku Becora, postu administrativu Kritu Rei no Munsipiu Dili, Sesta 08/04.

Tanba ne’e Vicente iha esperansa boot ba kandidatu Prezidente Republika na’in rua, ida ne’ebé eleitu ba Prezidente bele haree problema sira ne’ebé professor voluntáriu sira hasoru hela iha baze.

“Hau nia esperansa ba iha kandidatu na’in rua, ida ne’e maka sai Prezidente Republika, atu fó influensia ba Governu, atu haree netik problema ne’ebé professor voluntariu sira hasoru iha EBC 123 Darlau, laos deit ami maibe ba ami nia maluk professor voluntariu sira iha eskola seluk mós,” nia esperansa ba kandidatu Prezidente na’in rua.

Iha fatin hanesan Diana Maria Sarmento, nudar profesor voluntáriu hateten nia hanorin iha EBC 123 Darlau hahú inisiu tinan 2018 to’o agora, Eskola sira ne’e presiza rekursu umanu,  nasaun atu lao ba oin presiza edukasaun ne’ebé maka forte, edukasaun forte presiza professors sira.

“Ami mai hanorin iha ne’e hakarak entrega ami nia aan ho voluntáriu maibe ami nia prekupasaun importante maka governu tenke rekoinse ba professors voluntáriu sira tanba sira mós iha kontribuisaun no mós servisu ba nasaun,” Tenik nia

Iha esperansa ba kandidatu Prezidente Republika na’in rua, karik povu fó fiar ba kandidatu ida sai Prezidente Republika labele tuir iha fatin deit, maibe tun ba iha terenu hodi haree problema saida maka professor voluntariu hasoru iha terenu.

Ho ida ne’e husu ba Prezidente foun tenke fo kompeténsia, no knaar ba Ministériu sira liuliu ba MEJD atu bele tau matan ba rekursu umanu professor sira, tau matan ba kondisaun eskola sira, tanba povu maka hili ne’ebé tenke matan ba sira.

Nune’e mós Filomena da Costa Mali, hanesan professor voluntáriu haktuir, nia hahú hanorin iha eskola EBC 123 Darlau iha tinan 2020 to’o agora, ho ida ne’e nia husu ba iha MEJD atu bele tau matan ba iha professor voluntáriu iha eskola EBC

“Hau nia esperansa ba iha kandidatu Prezidente na’in rua ne’ebé atu eleitu ba Prezidente da Republika tenke kumpre imi nia promesa sira ne’ebé imi hato’o iha tempu kampaña, no tau matan ba edukasaun tanba edukasaun ne’e pillar importante ba nasaun ida, no liuliu tau matan ba ami professor voluntáriu sira,” ho esperansa boot

Maria Monis de Jesus mós professor voluntariu iha EBC dehan, nia hahu hanorin iha EBC 123 Darlau hahu husi tian 2027 to’o agora, no preokupasaun ne’ebé maka nia hasoru maka seidauk hetan kontratu hosi governu.

“Hau nia esperansa ba iha kandidatu prezidente Republika (PR) na’in ruan ida ne’ebé eleitu karik, bele haree mós problema professor voluntáriu nian, no bele loke dalan ba ami, atu nune’e ami mós bele hetan kontratu, no bele mós sai professor permanente iha tempu tuir mai,” Maria nia esperansa ba kandidatu na’in rua.

Print Friendly, PDF & Email

LEAVE A REPLY

Please enter your comment!
Please enter your name here