Reportajen Adroaldo “Saretukau”
Kampaña eleitoral loron da-toluk Partidu Os Verdes de Timor (PVT) ho númeru sorteiu 6, iha Munisípiu Manufahi, hato’o kumprimisiu neen (6) ba membru Verdes hotu iha Timor Lorosa’e laran tomak hanesan, harii sentru formasaun no servisu ho Global Green ho nasaun 10 ba apoiu empregu, implementa programa kooperativa, harii indústria hahan pekuária no peskas no apoiu bolsa de estudu ba membru sira.
Prezidente PVT, Antonio Lelahuno Cruz, hatete, sé povu fo fiar Partidu Os Verdes ultrapasa bareira eleitoral ho kadeira 5 to 7 iha eleisaun Parlamentar 21 de Maiu maka partidu sei utiliza orsamentu subvensaun hodi implemeta kompremisiu hirak hanesan harii sentru formasaun profesional empregu Verdes. Servisu ho Global Green hodi implementa progama empregu verdes hamutuk 50.000 ba nia membru sira iha nasaun 10. (Australia, Nova-Zelandia, Korea, Japaun, Kanadá, Inglaterra , Repúblika Irlándia, Irlándia Norte, Skotlandia ho Switzerland). Implementa programa hamutuk 1000 empregu Verdes, kooperativa Verdes ba membru Partidu Verdes. Servisu ho Global Green hodi implementa progama bolsa estudu ba membru Verdes hamutuk 1000. Harii indústria hahan ba fahi, manu no ikan hodi suporta implementasaun progama empreja/kooperativa Verdes ba membru sira, noInstala embaixador Verdes iha nasaun 10 hodi trata viza traballu no kontratu servisu hodi apoiu progama 50.000 empregu Verdes.
Prezidente Lelahuno haforsa, “ita atu ba governu ka la ba, ne’e la’os kestaun, ita nia luta mak ne’e, implementa empregu Verdes ba joven sira ne’ebé la eskola, joven sira ne’ebé la iha futuru, joven Verdes sira ne’ebé durante ne’e abandonadu husi estadu ida ne’e, Verdes hakarak oferese ba ita boot sira,” Nia dehan iha kampaña ne’ebé hala’o munisípiu Manufahi, Kampu Betano, sesta-feira, 21/04.
