Arnolfo “Arnie” Teves Jr eis-drogadu ida, rai kilat iha uma, no involve iha kazu oho governador ida iha Filipina, agora dadaun iha hela Timor-Leste husu aziliu politik. Imigrasaun rejeita tiha ona pedidu aziliu politik maibe diskonfia Teves sei halo rekursu.
Arnolfo “Arnie” Teves Jr. membru parlamentu ida hosi estadu Filipina halai ses hosi prosesu justisa iha Filipina mai Timor-Leste ho aviaun komersiu nian ida. Nia to’o iha Timor-Leste, ho aviaun aluga seman ida liuba iha Aerportu Presidente Nicolau Lobato. Bainhira nia to’o mai Dili, nia hetan kedas asistensia hosi advogadu sira no husu kedas aziliu politik ba estadu Timor-Leste maibe pedidu ne’e rejeitadu tiha ona hosi Dirasaun Imigrasaun Timor-Leste nian.
“Los duni, senhor ne’e hatama duni pedidu husu aziliu politik maibe ami rejeita tiha ona bazeia ba Lei Imigrasaun no Aziliu Politik, Nu.11/2017. Nia la priense kriteriu ba hetan aziliu politik. Ami nia parte halo tiha ona prosesu no agora dadaun problema ne’e iha ona Ministeriu Interior nia liman,” dehan Diretur Jeral Imigrasaun Adelaide da Rosa nian ba Neon Metin, liu hosi telefone horiseik, 15/05.
Imigrasaun fo tempu loron lima ba Teves atu halo rekursu. Prosesu ba halo rekursu hahu hosi kinta semana kotuk no sei termina iha kuarta semana ida ne’e.
Tuir media online Inquirer.Net, Ministru Justisa Filipina, Jesus Crispin Remulla, nian hakerek ona kart aba governo Timor-Leste atu rejeita pedidu aziliu hosi Teves. Filipina iha interese ho Teves tanba involve iha kazu oho ema no iha hela prosesu atu konsidera Teves nudar terorista.
Informasaun hosi rappler.com fo sai kona ba se mak Teves?
Teves nia naran kompletu mak Arnolfu “Arnie” Teves Jr. Nia mak repzentante ida hosi Distritu Negros Oriental iha Senadu Filipina nian. Teves hetan tiha ona alegasaun ba kazu krimi homisidu tolu iha Negros Oriental hahu hosi tinan 2019. Polisia Nasional Filipina mos foin lalais tama no pasa revista Teves nia uma tanba nia rai kilat ho dokumentu mak diskonfia falsu.
Kazu homisidu ida ne’ebe diskonfia involve Teves mak kazu oho Governador Negros Oriental nian, naran Roel Degamo. Iha kazu ida ne’e diskonfia forte Teves nia involvementu tanba Teves nia alin rasik Pryde Henry Teves mak kompete iha eleisaun hasoru Governador matebian.
Iha 2016, Teves hamutuk ho nia familia no apoiante sira fo suporta makas ba matebian Ditador Marcos nia oan Ferdinand Marcos Jr. Razaun ba suporta Ditador Marcos nian oan ne’e tanba Teves nia avo mane mak nudar aliadu forte ida ba Ditador Marcos.
Teves uza droga
Teves mos nudar ema ida ne’ebe uza droga durante tinan barak no Ajensia Autoridade ba Kombate Groga (PDEA) nian informa mos katak Teves mak Negosiador Droga ida iha nia rai. Teves rasik rekoinese ba Senadu nia laran katak nia mos nudar ema ema mak uza droga, “Hau foin para konsumu droga tinan 16 liuba”, Teves hatete ida ne’e iha fatin senadu nia laran.
Teves iha armas
Iha inisiu 2023, Polisia Nasional Filipina nian hasai lisensa ba armas mak Teves nudar nain. Teves iha kilat bot 3 no kilat badak 9. Teves, antes husu lisensa ba rai liur, fo hatene ba polisia atu entrega nia kilat sira maibe Polisia tama uluk ona nia uma tanba diskonfia utilizasaun kilat sira ne’e relasiona ho homisidu iha 2019.
