Reportajen David da Costa
Aban loron 21 Maiu 2023, sidadaun Timor-Leste vota hodi hili partidu politikus sira ne’ebé maka sei reprezentante povu iha uma fukun Parlamentu Nasionál. Tanba ne’e sidadaun sira hotu ketak haluhan aban tuku 7:00 dader to’o 15:00 loraik, ba sentru votasaun iha ida-idak nia suku hodi bele hili partidu politikus sira tuir ema idai-idak nia konsiensia.
Marcelino Martins nu’udar mós eleitór husi suku Bairo Pite, hateten, nu’udar sidadaun ne’ebé maka diak iha Nasaun ida, iha dever atu vota hodi hili partidu politikus sira ne’ebé maka sidadaun ne’e hakarak. Tanba ne’e husu ba sidadaun hotu keta haluhan aban ba vota, no hili ida-dak nia partidu maibé hili ho konsiensia.
“Sim, aban konserteza sei ba vota iha hau nia suku Bairo Pite. Husu ba sidadaun Timoroan, liu-liu ba foinsa’e sira, keta haluhan aban ne’e loron votasaun, loron demokrasia i loron liberdade ba ita, atu ita festeza ho enjoy, ita ba ezerse ita nia direitu tuir partidu politiku ne’ebé maka ita hakarak no vota tuir ita nia konsiensia,” dehan Marcelino ba Neon Metin, iha ámbitu komemorasaun loron Restorasaun Indepedensia ba bala-21 iha Palásiu Prezidente Bairo Pite, Sabadu 20/05
Ana de Jesus Amaral, nu’udar eleitor husi suku Bairo Pite, hateten, aban loron espesial ida ba Timor no ba povu Timor-Leste, atu hili ida-idak nia partidu hodi bele reprezentante povu iha uma fukun Parlamentu Nasionál, tanba ne’e husu ba sidadaun sira ne’ebé maka idade to’o ona atu vota, aban keta haluhan hakbesik ba iha ida-idak nia suku hodi bele ezerse ita boot nia direitu nu’udar sidadaun Timor.
“Aban hau sei vota iha hau nia suku Bairo Pite. Hau nia mensajen ba ita hotu joven no inan aman, no ita ida ne’ebé maka iha ona kartaun eleitorál, hanesan Timoroan, ita nia direitu, ita nia devér, ita nia knar ba loron ida aban maka tenke ba vota, hodi hili partidu ne’ebé maka ita hakarak, atu bele reprezenta ita iha parlamentu. ita nia mehi ne’ebé maka ita hein esperansa katak buat ne’ebé ita hili iha desizaun ba ita hotu,” nia husu ba elitores sira.
Afonsu Martins Da Crus, nu’udar eleitór husi suku Riheu Ermera, hateten, sidadaun ne’ebé maka diak, no Timoroan, aban keta haluha ba vota iha ida-idak nia suku hodi hili reprezentante povu iha parlamentu Nasionál no iha governu, maibe aban joven no inan aman sira aban vota tenke tuir ida-idak nia konsiensia.
“Sim, aban hau sei ba vota iha Ermera suku Riheu. Hau husu ba joven sira no inan aman sira hotu ne’ebé iha ona kartaun eleitorál, hanesan sidadaun ne’ebé maka diak tenke hakbesik-an bai ha sentru votasaun hodi hili ita nia reprezentante iha parlamentu no governu para bele hadi’a ita nia rai no nasaun ne’e ba oin, maibe importante joven sira maka tenke brani no tenke ba vota tuir ida-idak nia konsiensia,” nia dehan.
Laurena De Jesus nu’udar Elitora husi Suku Kameia husu ba joven no inan ho aman sira ne’ebé maka iha kartaun elitorál aban hakbesik-an ba iha ida-idak nia suku no ba iha sentru votasaun hodi bele vota nu’udar sidadun Timor.
“Aban hau sei ba vota iha Becora suku Kameia. Husu ba joven ho inan aman sira hotuk katak aban keta haluha ba vota hodi ezerse imi nia direitu nu’udar ema sidadaun Timor-Leste hodi hili reprezentante povu no governu foun,”nia hateten.
