Reportajen Joselina dos Santos
Prezidente Repúblika Jóse Ramos Horta husu ba partidu politiku sira atu hatudu dixiplina no maturidade no respeita povu, hodi povu bele ezerse sira nia direitu hodi hili partidu ida ne’ebe povu fó konfiansa, atu hamenus kiak iha Timor-Leste no tau matan ba inan isin rua, nomos ba ferik katuas sira iha futuru.
Prezidente Repúblika hato’o parabens ba CNE, STAE, PNTL, F-FDTL nomos ba autoridade sira ne’ebe servisu makaas kontra tempu. Hori kalan akompaña situasaun informasun balun la kompletu no balun tendesiozu maibe xefe estadu sempre kordena ho komandante polisia ho verifika purtantu polisia ho forsas armadas atentu loos iha fatin hotu atu evita problema.
“Ha’u fiar lider sira hotu nomos sira nia reprezentante iha fatin hotu-hotu, ha’u apelu ba sira atu kalma, hatudu dixiplina, partidu sira nia maturidade, respeita povu nia direitu soberanu atu vota. Ita hotu hein no simu rezultadu husi povu, povu ne’ebe iha poder kada tinan lima hodi ezerse poder, sira mak hili ita. Ne’e duni ita hotu tenke komporta diak atu povu bele vota hakmatek no moris hakmatek ba oin,” dehan Prezidente Repúblika Ramos-Horta iha sede Suku Metiaut, Domingo 21/05.
PR hatutan, lider partidu politiku sira tenke sai numeru 1 halo apelu kalma, respeitu malu, simu rezultadu ne’ebe mai hosi eleisaun ida ne’e. Povu nia direitu soberanu atu hili lider sira, povu ke kiak susar atu hetan vida diak. Espera iha governu ida matenek ho vizaun halo ekonomia bele haksoit ba oin atu kiak iha Timor-Leste, nomos fó atensaun boot ba kosok-oan, inan ferik no katuas sira ba oin.
“Kria empregu ba joven sira nomos fó oportunidade diak liu ba joven sira ba estuda, halo desportu, pratika kultura, tane joven sira atu partisipa iha estudu nasional no internasional,” nia hatutan.
