Reportajen Silvino Freitas
Konsellu Imprensa (KI) konsidera papél média no jornalista sira nian importante atu hala’o kobertura notísia kona-ba impaktu no risku ambiente ba sosiedade, tanba ne’e KI apresia programa média-tour ne’ebé organiza husi AJTL no Oxfam iha Timor Leste.
Diretór Relasaun Instituisaun no Informasaun Konsellu Imprensa Altino da Cruz hateten, papél husi média no jornalista importante tebes bainhira ko’alia kona-ba ambiente, nune’e liuhusi buletin média-tour ne’e parte ida atu aumenta konesimentu ba importánsia husi ambiente ne’ebé di’ak.
“Jornalista sira iha konsensia ne’ebé di’ak karik, kuandu nia la’o ba iha Likisá karik nia haree portu tibar nia gava, maibé haree fali ba iha lixu iha tibar ne’ebé ema sunu nia suar ne’e fó impaktu tebes ba populasaun sira ne’ebé hela iha tibar, liuliu labarik ki’ik no inan feton sira” dehan Altino hodi fó ezemplu ba jornalista sira, iha ambitu lansamentu buletin média-tour iha Oxfam Hudi-Laran Dili, (12/06).
Nia dehan tan, lixu nia impaktu ba ikan sira iha tasi-laran mós sai parte ida bele lori ikan sira ne’ebé di’ak ho vitamina dook husi tasi-ninin, tanba impaktu lixu ne’ebé kontinua hodi halo ikan sira ne’e folin karuk, nune’e jornalista sira nia servisu liuhusi programa ne’ebé AJTL no Oxfam realiza ne’e importante tebes, kuandu sira lori jornalista sira ba hala’o kobertura iha munisípiu kona-ba ambiente ne’e fó ona kapasitasaun ba asuntu ambiente ne’e importante tebes entaun sira mós aumenta tan konesimentu.
“Kuandu sira nia konesimentu ne’e di’ak entuan iha pratika mós aumenta konserteza númeru produsaun notísia kona-ba asuntu ambiente mós aumenta, nune’e sosiedade sira mós informadu kona-ba impaktu ambiente no nia risku sira husi notísia sira ne’ebé jornalista sira prodúz mós bele bolu atensaun ba governu no kompaña sira bele hamosu programa kona-ba ema hadomi ambiente ne’e, nune’e mós kompaña sira bele hala’o resiklajen ba lixu sira ida ne’e tanba jornalista sira nia servisu” dehan Altino.
Nia informa tan katak, apresia tebes ba programa refere no servisu jornalista sira importante tebes hodi informa no apoiu, nune’e mós programa média-tour ne’e tenke iha nia kontinuidade, nune’e jornalista sira iha média dijitál no konvensionál, presiza tau asuntu ambiente ne’e iha sira nia kobertura nomós bele hamosu programa liga ho programa ambientál, tanba ne’e konsellu imprensa apresia no prontu apoia programa média-tour ne’e.
