Reportajen David da Costa
Primeiru Ministru (PM) Taur Matan Ruak ho Primeiru Ministru Foun Indijitadu Kay Rala Xanana Gusmão, hasoru malu ho Prezidente Republika (PR), Dr. José Ramos-Horta hodi ko’alia kona-ba Relatoriu VIII Governu konstitusionál, atu entrega ba nonu governu iha loron 1 Jullu 2023.
Prezidente Republika (PR),Dr. José Ramos-Horta hatoo agradese bo’ot ba Primeiru Ministru Taur Matan Ruak iha nia mandatu, maske iha tempu ne’ebé nia kaer todan nu’udar Primeiru Ministru, iha situasaun difisil iha rai laran. Maibé ohin simu Primeiru Ministru sesante Taur Matan Ruak, enkontru di’ak ho Primeiru Ministru foun.
“Ohin ho maun bo’ot Xanana, ami hasoru malu ko’alia nu’udar Primeiru Ministru sesante no Primeiru Ministru foun atu iha dokumentu, no buat hotu-hotu prontu husi VIII Governu konstitusionál ba nonu governu. Atu nune’e Primeiru Ministru foun to’o iha Palasiu Governu, relatóriu iha meja leten, no ministru sira seluk mós husik sira nia relatóriu iha meja leten ba Ministru foun sira,” dehan Prezidente Republika (PR) José Ramos-Horta, iha Palásiu Prezidente Bairo-Pite, Sexta 30/06.
Nia haktuir, Primeiru Ministru sesante hateten ona no fó orden ona ba Ministru sira ne’ebé atu sai ne’e, katak sé bainhira Ministru foun sira prezisa atu esklarese buat ruma, sira tenke disponivel atu nune’e servisu hamutuk ida di’ak atu halo tranzisaun ba Governu foun ne’e la’o di’ak, no ba futuru Primeiru Ministru Taur Matan Ruak mak hateten ona, nia sempre disponivel atu apoiu governu foun, atu iha enkontru ruma, ka forum ruma presija rona Primeiru Ministru Taur Matan Ruak nia opiniaun, nia prontu atu kontribui.
Nia esplika, Líder na’in rua ne’e nunka se presija ema ruma atu halo saida hamutuk. Maibé iha tempu sira ne’ebé liu bá, sira na’in rua hanesan lutadór bo’ot rua ba nasaun no povu ida ne’e, ida hanesan ema ne’ebé estratéjiku no ida seluk nu’udar tatiku militár no sira na’in rua iha vida polítika riku tebe-tebes ho esperénsia iha tinan 20 ba konstrusaun estadu.
Nune’e mos Primeiru Ministru Indijitadu, Kay Rala Xanana Gusmão, hateten, atu ko’alia tan saida? Prezidente Repúblika ko’alia hotu tiha ona saida mak ohin ko’alia iha leten ne’e
Bainhira jornalista sira husu Lider kay Rala Xanana Gusmão no Taur Matan Ruak, kona-ba durante tinan naruk sira nain rua nunka hasoru malu no ko’alia ba malu, maibé ho oin Hamnasa Lider Taur Matan Ruak hatan ba jornalista sira katak dook husi matan, maibé nia besik iha fuan.
“Jauh di matan, dekat di hati” Primeiru Ministru Taur Matan Ruak hatan ho oin hamnasa.
