Reportajen Silvino Freitas
Ministro Negósiu Estranjeiru no Kooperasaun (MNEK), Bendito Freitas foun sei fó importánsia ba polítika bilaterál, multilaterál no mós adezaun Timor Leste ba ASEAN, nune’e mós servisu preparasaun ba adezaun sei la fasil tanba sei iha road-map ne’ebé todan no boot oituan.
Tuir MNEK Bendito Freitas katak, iha periodu 100 dias fokus ba interesante maka atu haree polítika prioridade maka ne’ebé definido iha MNEK nian liga ba polítika bilaterál multilaterál no mós regionál nian espesiálmente adezaun Timor Leste ba ASEAN ne’ebé sai elementu sentrál nune’e bele iha responsabilidade no kompeténsia tomak atu sai membru, nune’e mós MNEK nia papél importante mak atu reprezenta polítika esterna país nian atu bele lori Timor ba mundu nomós lori mundu mai Timor prinsipalmente aspeitu investimentu.
“Diplomasia ba polítika esterna atu bele garante no atrai investimentu sira tanba Timor Leste nia diplomata no konsul sira ne’ebé reprezenta atu promove interese Timor Leste nian nomós kria parseiria hodi involve makaas liu investimentu sira husi liu konvida mai, hodi investe no Prodúz kresimentu ekonomiku kria kampu traballu no fó mobimentu iha situasaun faborabel” dehan MNEK Bendito Freitas hafoin handover husi MNEK sesante, (03/07).
Entretantu MNEK sesante Adalgisa Magno hateten, servisu ba MNEK foun la’ós fasil tanba iha road map ne’ebé boot no todan uituan maibé iha Vise-Ministra ne’ebé durante tinan 6 nia laran servisu ba asuntu ASEAN nian, tanba iha komprimisu balun ne’ebé hala’o ho país 10 nomós parseiru ASEAN nian nune’e iha buat boot ida mak tenke implementa nune’e mós to’o iha 2029 tenke priense ona roteiru ne’ebé sira aprezenta ba Timor Leste, maibé nafatin iha advice no iha responsabilidade morál atu kolabora nu’udar Timoroan.
“Durante mandatu iha tinan 3 nia laran la’ós mandatu ne’ebé fasil tanba iha tempu pandemia covid no kalamidade nia laran, tempu ne’ebé susar tebes la’ós fasil, ita iha responsabilidade adisionál hodi diriji sasan no ministériu ida ne’e” dehan Adalgisa iha serimónia hand-over iha salaun nobre MNEK Dili, (03/07).
