Reportajen Joselina dos Santos
Governu Republika Popular China, liuhusi nian Ministru Adjuntu Negósius Estranjeirus (MANE) Nong Rong, vizita Governu Timor-Leste, hodi ko’alia kona-ba konsulta diplomatika entre nasaun rua nomós kona-ba kooperasaun bilateral no multilateral nomós rejional.
Hafoin enkontru, Vise-Ministra ba Asuntu ASEAN, Milena Maria da Costa, hateten ohin Timor-Leste hetan vizita husi país amigu Vise-Ministru China, inisiu formasaun governu depois semana rua liu ba hatudu komprimisu boot husi povu China ba kooperasaun ne’ebe eziste ona ba relasoens diplomatikas entre país rua.
“Ohin ami ko’alia kona-ba konsulta diplomatika entre nivel vise-ministru, nune’e ami ohin elabora asuntus lubuk ida kona-ba kooperasaun bilateral, multilateral no rejional nomós ita nia prosesu adesaun ba ASEAN ne’ebé apoiu tomak husi rai China ba Timor-Leste ba prosesu adesaun ba preparasaun atu bele tama iha komunidade rejional iha tempu badak nia laran,” dehan, Vise-Ministra Milena Maria da Costa Hafoin Enkotru iha Salaun MNEK Pantai-Kelapa, kuarta 19/07.
Iha fatiin hanesan, Ministru Adjuntu Negósius Estranjeirus Republika Popular China, Nong Rong hatutan, China nu’udar nasaun primeiru ne’ebé rekoñese independensia Timor nian nomós nasaun dahuluk ne’ebé halo relasaun diplomatiku ho Timor-Leste. tanba ne’e apresia tebes ba saida mak Timor-Leste hetan nomós halo desde restaura nia independensia.
“Ami agradese tebes tanba China iha oportunidade hodi oferese ajudus ida ba dezenvolvimentu Timor-Leste nian, inklui mos Ministeriu ida ne’e ho asistensia husi governu China. Ami kontente oferese ajudus ba Ministeriu Estrajeiru Negosius Timor-Leste nian ne’ebé hetan ajuda husi China nune’e sei kontinua amizade iha futuru”, nia dehan.
