Reportajen Agustinha Amaral
Acalina Soares kontente nia laen hetan oportunidade ba servisu iha Korea Sul hodi sustenta família, tanba durante iha Timor susar hetan servisu. Nia sente kontente mos tanba governu Korea no Governu Timor-Leste fo oportunidade ba Timoroan sira servisu buka moris iha nasaun Korea Sul.
“Orgullu boot tanba ha’u nia kaben hetan oportunidade ida ne’e atu ba servisu iha ema nia rai nune’e bele dezevolve nesisidade báziku uma laran, tanba durante ne’e ami la iha kbiit atu hetan servisu ruma iha Timor, maibé ohin nia kursu liu ona iha ezame entaun nia bele ba servisu iha ema nia rai hodi buka osan entaun ne’e agradese.” dehan Acalina Soares ba Neon Metin.
Nia mensajen ba traballadór Timoroan nebe atu ba servisu iha Korea Sul inklui nia kaben, atu ba servisu karik kuidadu aan no tane aas nasaun Timor-Leste nia naran no la bele halai ses husi sistema nune’e la bele taka dalan ba Timor-oan sira ne’ebe hakarak ba servisu nafatin iha ema nia rai.
Tuir traballadór Moisés dos Postus nia esperansa atu ba servisu iha Korea Sul, atu buka osan hodi sustenta nesesidade báziku uma laran inklui atu dezenvolve nasaun Timor-Leste. Primeiru hasoru dezafiu barak iha momentu tuir kursu maibé dezafiu hirak ne’e la hamate nia vontade, ikus hetan duni mehi ne’ebé nia hakarak.
“Durante kursu Korea fulan neen familia sira suporta maka’as, entaun ha’u esforsu hodi kontinua kursu to’o tuir ezame, entaun ikus atu hakat ain sai Timor buka moris iha ema nia rai ne’e sente apresia tebes tanba bele hetan oportunidade di’ak hodi ba servisu iha área peskas nian.” dehan Moises dos postus ba Neon Meitin iha salaun Timor Lodge, Sesta-feira, 21/07.
Molok traballador Timoroan atu ba servisu iha Korea Sul, primeiru hetan dezafiu barak maibe dezafiu hirak ne’e la hamate sira nia vontade ohin sira asina duni deklarasaun ho SEFOPE atu ba servisu iha Korea iha área peskas nian.
