Reportajen Umbelina dos Reis
Sekretáriu Estadu Formasaun Profesional Empregu (SEFOPE) liu.hosi Diresaun Nasional Empregu Exterior (DNEE) hala’o serimónia despendida no asina deklarasaun entre família traballador Timoroan na’in 20 hosi área peskas ne’ebé sei ba servisu iha Korea Sul.
Xefe Gabinete Sekretáriu Estadu Formasaun Profesional Empregu (SEFOPE), Jacinto Ribeiro Dias hateten, objetivu hosi asina kontratu ne’e hanesan regras ne’ebé nasaun Timor-Leste no Korea Sul sempre halo bainhira husik traballador ba servisu iha Korea no Australia, hosi serimonia ne’e bele kesi metin traballador nia misaun nune’e servisu iha ema nia rai tenki kumpri normas ne’ebé governu Korea ho governu Timor-Leste halo koperasaun.
“Timor-Leste tama ona iha liña traballador nune’e husu ba Timoroan kaer metin objetivu ne’e hodi kontinua nafatin dezenvolve aan iha ema nia rain, kontinua obedese tuir ema nia kultura, mezmu Timor iha identidade kultura rasik maibé obedese nafatin nune’e buka moris hodi sustenta familia sira nia nesesidade báziku, inklui dezenvolve rai Timor.” dehan Xefe Gabinete SEFOPE Jacinto Ribeiro Dias, ba Jotnalista sira iha Salaun Timor Lodge, Comoro, sexta-feira, 21/07.
Nia dehan, Timor oan barak mak hakarak rejistu naran atu ba Korea no Australia maibé laiha vontade atu tuir kursu oinsá mak bele partisipa másimu hodi asina deklarasaun hanesan na’in 20 ne’ebé agora dadauk tuur hela ne’e, nu’udar joven ne’ebé matenek hakarak halo mudansa iha futuru tenki respeita, pasensia, badinas, nune’e bele aproveita tempu hodi buka moris iha ema nia rai, tanba buka moris iha rai seluk ne’e la fasil hanesan saída mak ita tuur hodi imajina de’it.
“Espera katak tinan 10-20 mai tan traballador Timoroan labele hela metin ona iha Timor maibé sai fali empregador hodi bolu traballador hosi nasaun seluk mai servisu iha Timor, hakerek lia-fuan ne’e iha fuan, nune’e jerasaun mai labele traballador nafatin iha ema nia rai. Timoroan la’os ba Korea, maibé tan servisu buka osan ne’e mak iha Korea.” Jacinto enkoraja traballador sira.
Diretór Diresaun Nasional Empregu Exterior (DNEE), Filomeno Soares hateten, objetivu hosi serimónia refere atu kria aseitasaun entre governu Timor-Leste no familia traballadores Timoroan, antes traballador atu ba servisu iha Korea Sul, la’os obriga hosi governu maibé governu kria oportunidade atu fasilita, traballdor só aproveita ba servisu hodi hadi’a moris.
“Eventu hosi serimónia ne’e signifika familia traballador aseita no prontu ona husik oan, kaben ba servisu iha ema nia rain, nune’e loron ikus iha falla ruma karik keta fó sala ba governu maibé familia traballador hamutuk ho governu hamutuk hafoin rezolve.” Dehan Diretor DNEE Filomeno Soares ba Jornalista sira, iha salaun Timor Lodge, sexta-feira, 21/07.
Nia husu ba traballador Timoroan sira ne’ebé atu ba servisu iha Korea Sul keta halai ses hosi sistema maibé mantein kumpri regra, nune’e governu Korea Sul kontinua fó konfiasa ba governu Timor-Leste atu futuru oin mai labele taka dalan ba Timoroan ne’ebé da-dauk ne’e prepara aan.
Familia traballador, Silvina Gomes, hosi munísipiu Bobonaro hateten, sente kontente no agradese tebes tanba oan mane Lucas hetan oportunidade ne’e hodi ba servisu iha korea, mesmu dala barak ema dehan servisu iha Korea ne’e todan maibé ami familia moris simples hakarak halo mudansa ba futuru, entaun oan husik nia eskola universidade UNTL, semestre 8, hakarak ba servisu iha ema nia rai hodi hetan osan.
“Nu’udar inan sente triste husik oan mane ba servisu iha rai dook, maibé ho kondisaun moris uma laran, nia hakarak husik ami familia la’o ba buka osan hodi hadi’a futuru aban bainrua nian. Husu ba Timoroan hotu ne’ebé servisu iha rai li’ur karik tenki kumpri regra no orden nune’e fila mai Timor isin di’ak nafatin.” Nia hato’o.
