Reportajen Silvino Freitas
Asosiasaun Difisiénsia Timor Leste (ADTL) ho inisiativa konvida Ministériu Solidaridade Sosiál no Inkluzaun (MSSI), hodi hala’o sensibilizasaun ba programa Bolsa da Mãe Jerasaun Foun (BdMJF), nune’e organizasaun sira neebe tau matan ba ema ho difisensia sira bele hetan informasaun kona-ba rekezitu nesesáriu sira atu bele tulun ema ho difisensia bele asesu ba programa refere, tanba programa refere la’o ona iha munisípiu 7 no ema liu 30.000 maka benefisía ona maibé ema ho difisiensia saida’uk másimu foin nain 130.
Lucas Tois Diretór Nasionál Asisténsia Sosiál husi MSSI haktuir, sensibilizasaun ne’ebé MSSI hala’o nu’udar inisiativa husi ADTL nian hanesan meius ida atu bele dizemina informasaun kona-ba programa bolsa da mãe jerasaun foun nian, maibé antes ne’e iha ona sosializasaun ba fatin sira ne’ebé sai alvu ba implementasaun programa refere, maskí iha Dili seida’uk tama ba iha alvu maibé husi parte ADTL nian hahú ona konvida MSSI atu bele hala’o uluk ona sosializasaun ba programa bolsa da mae jerasaun foun nian, nune’e husi parte ADTL bele hetan ona informasaun kona-ba programa refere.
“Dadus ikus ne’ebé rejista husi munisípiu 7 dadaun ne’e sai alvu ba implementasaun iha fulan juñu tinan 2023 husi MSSI rejistu no prosesa ona pagamentu aplikante hamutuk, rihun tolunulu resin tolu-tolunulu resin haat, numeiru ne’e kompostu husi labarik 0-6 anos hamutuk 36.829, inan isin rua hamutuk 3.998 no labarik ho difisiensia hamutuk 130, ne’e maka elezivel ona atu hetan pagamentu, maibé dadus online balun to’o dadaun ne’e sei rejísta nafatin no sei atualiza fila fali” dehan diretor Lucas ba jornalista sira iha salaun ADTL Mascarinhas, (16/08).
Nia dehan tan, munisípiu hitu ne’ebé hala’o ona implementasaun maka hanesan Rejiaun Administrativa Espesiál Oekussi-Ambeno (RAEOA), Ainaro, Likisá, Bobonaro, Manatuto, Covalima no Vikeke, ne’e maka tama iha pagamentu refere ho numeiru ne’ebé fó sai ona, iha mekanizmu ba pagamentu maka husi MSSI nia parseiru ajénsia finanseiru sira, nune’e Ainaro Bobonaro no RAEOA ne’e responsabiliza husi TELKOMSEL-TSD, no munisipiu 4 Vikeke Manatuto Likisa Covalima nee responsabiliza husi TELEMOR-MOSAN, ajénsia sira ne’e maka hala’o pagamentu ba benefisiáriu sira.
“Loloos ne’e ministériu iha akordu uluk ho BNCTL maibé iha difikuldade lubuk ida liga ho instrusaun BCTL nian ba BNCTL, kona-ba aplikasaun dokumentu identidade rua no tolu ne’ebé eziste iha timor leste entaun difikulta ba benefisiariu sira atu bele hetan transferensia husi BNCTL, nune’e temporariamente asegura pagamentu ne’e mak MSSI hili ajensia finanseiru sira ne’ebe hetan ona autorizasaun husi BCTL atu bele halo tranferensia uluk, tanba pagamentu nee tenke la-o fulan-fulan” esplika Lucas.
Fatin hanesan Diretór Ezekutivu ADTL Sejario da Silva haktuir, husi parte ADTL konvida MSSI atu bele hala’o sosializasaun ba programa bolsa da mae jerasaun foun ba organizasaun sira neebe tau matan ba ema ho difisensia, nune’e husi organizasaun sira ne’ebe tau matan ba ema ho difisensia bele hola parte atu bele intende di’ak ba programa ida bolsa da mae ne’e, nune’e mos bele hatene rekizitu importante sira neebe presiza atu asesu ba programa refere.
“Durante ami nia preokupasaun labarik ho difisensia sira la hetan apoiu ruma liu-liu subsidiu refere, tanba ne’e governu iha programa bolsa da mae ami nia parte rona informasaun sira ne’e hodi bele tulun labarik difisiensia iha baze atu bele hola parte bolsa da mae jerasaun foun” dehan Sejario iha ADTL Mascarinhas Dili.
Nia dehan tan, husi parte ADTL nian hahu aprosima ba munisipiu neebe identifikadu atu bele tulun, hodi bele identifika labarik difisensia maka durante nee sei menus tulun ba labarik sira atu benefisia ba programa ne’e, tanba nee husi sosializasaun nee organizasaun sira neebe tau matan ba ema difisensia sira bele hatene nia prosesu no rekezitu sira, hodi ADTL mos sei tuun ba baze hodi tulun no halo sensibilizasaun kontinuasaun ba komunidade difisensia sira, tulun inan aman sira hodi refere sira ba programa refere.
“Ita la’o tuir programa governu nian ba munisipiu neebe tama iha tarjeitu iha faze dahuluk nee ema ho difisensia sira seidauk masimu, tanba nee maka ami buka atu intende didiak programa nee hodi tulun inan aman sira bele rejista labarik ho difisiensia” konklui Sejario.
