Reportajen Silvino Freitas
Ministru Juventude Arte no Kultúra (MJDAC), Nelio Isac Sarmento konsidera arte marsiais hanesan atividade desportu, presiza organiza no mobiliza ho di’ak hodi kumunga doutrina arte-marsiais nian, nune’e mós krime sira ne’ebé akontese ne’e la’ós arte marsiais mak envolve tanba doutrina arte-marsiais la hanorin membru sira atu kria violénsia.
Tuir Ministru Nelio Isac Sarmento, arte-marsiais nu’udar seni-beladiri ne’ebé dadaun ne’e hala’o nia atividade normál, nune’e governu iha komitmentu nafatin atu arte-marsiais ne’ebé kontinua nia atividade hanesan modalidade desportu ida, tanba ne’e presiza organiza an halo didi’ak nune’e governu bele apoiu hodi dezenvolve ho di’ak liu tan.
“Arte marsiais ne’ebé la dezenvolve ho di’ak ami presiza akompaña hodi fó hanoin ba sira beibeik atu sira bele organiza sira nia organizasaun, hodi bele hetan tulun mai husi estadu nune’e bele profesionaliza sira nia organizasaun” dehan Nelio iha ETDA Fatuhada Dili, (04/08).
Nelio dehan tan, uluk governo taka arte-marsiais tanba atu hatudu ba sira katak sira bele konsolida an buka hadi’a sira nia organizasaun ho didi’ak, hakarak loke arte-marsiais maibé ikus mai ema balun sofre tanis no balun sai vitíma ba problema sira ne’ebé kria husi sira rasik, maibé depois andamentu ba sira hodi organiza no responsabilidade hodi kria paz no estabilidade ne’ebé di’ak iha país RDTL entaun fó oportunidade ba sira para atu bele hala’o fali pratika ba arte-marsiais nian.
“La’ós arte-marsiais hotu mak envolve iha krimi envolve iha krimi ne’e ema individu ne’ebé ba tuir arte-marsiais hodi sai membru, maibé la kumunga doutrina arte-marsiais nian, tanba ne’e ha’u la fiar arte-marsiais ne’ebé eziste iha mundu no Timor Leste ne’e hanorin nia ema ne’e sai violentu halo krime laiha, maibé ne’e mai husi ema nia sifat mentalidade ne’ebé la kumunga doutrina arte-marsiais rasik” Nelio esplika.
Governante ne’e husu ba membru arte-marsiais hotu atu nafatin mobiliza an hodi kontinua hala’o atividade maibé tenke kaer ba unidade hodi kria paz no trankuilo iha Timor Leste, nune’e iha nonu governo ne’e konsidera arte marsiais ne’e hanesan atividade desportiva hodi haree ba prestasaun nune’e bele kompete iha atividade internasionál, klaru presiza iha kondisaun ne’ebé kria ba sira maibé tenke haree mós ba organiza mobilizasaun inklui prestasaun.
