Home Justisa Loron 7 Julhu Mari Alkatiri Sei Hatoo Keixa Ba MP Hasoru CPN...

Loron 7 Julhu Mari Alkatiri Sei Hatoo Keixa Ba MP Hasoru CPN Partidu CNRT, Ne’ebe Akuza Simu Subornu

1611
0
Sekretariu Jeral partidu Fretilin, Dr. Marí Alkatiri iha palacio prezidensia. [Foto: Zevonia Vieira | 25.01.2020]

Reportazen Zevonia Vieira

Sekretariu Jeral FRETILIN, Dr. Mari Alkatiri sei hatama keixa iha Prokurador Jeral da Repúblika iha Colmera – Dili, atu hato’o ninia keixa hasoru membru CPN partidu CNRT nian, iha loron 7 Julhu, ne’ebé raut fila fali lixu husi tinan-2002 ne’ebé akuza Dr. Mari Alkatiri simu subornu husi kompaña ConocoPhillips.

Liu hosi komunikadu imprensa ne’ebe Neon Metin asesu, iha loron 6 Julhu esplika katak, koalia kona-ba prosesu ba Ministeriu Públiku, Sekretariu Jeral FRETILIN esplika katak iha tinan barak nia laran ona, mak nia sai vitima ba black campaign  (kampanha metan) oioin, hahu husi diskriminasaun vitima ba vingansa oioin no vitima ba inveija. Tamba ne’e Dr. Mari Alkatiri hatete, “tempu to’o ona ba ha’u atu halo apelu ba RDTL nia sistema Justisa. Tempu to’o ona atu fo tempu ba Justisa Estadu RDTL nian,” Dr. Mari Alkatiri subliña.

Iha komunikadu imprensa esplika katak Dr. Mari Alkatiri hahu ninia luta ba Timor-Leste nia independensia ho otas ne’ebé nurak tebes, seidauk atinji idade tinan 20. Ninia luta ba Timor-Leste nia Ukun Rasik An, sei kontinua to’o ohin loron ho idade tinan 70 liu ona.

“Iha tempu naruk ida hanesan ne’e, ha’u hasoru dezafiu oi-oin, dezafiu luta kontra kolonialismu, dezafiu luta kontra espansionismu rejimi Soeharto nian, etc, maibé dezafiu ida permanente liu no foer liu mai kedas husi ha’u nia maluk timor oan sira balu. Besik tinan 50 mak ha’u ho hau nia familia tomak, sai vítima ba sira. Vítima ba diskriminasaun oin-oin, ba ódiu no vingansa, ba inveja.” Dr. Mari Alkatiri hatete.

Tuir Dr. Mari Alkatiri, hahalok at sira ne’ebe hasoru nia, seidauk para maibé hetok sai boot no forte liu tan. Ate to’o ona iha faze ida ne’ebé, mak ema sira ne’e rasik la konsege hafahe entre ida ne’ebé mak lia los no ida ne’ebé mak lia bosok.

“Agora iha faze ida ne’ebé sira tama ba dezesperu, sira haboot tan sira nia odiu mai ha’u, sira hatudu momos sira nia frakeza, uza lia bosok atu difama, hala’o kalunia ho injuria, atu taka sira nia sala durante tinan 12 ukun Timor-Leste. Atu halai husi Justiça, sira buka atu trava FRETILIN nia dalan ba vitória”, Dr. Mari Alkatiri esplika.

Ho razaun ida ne’e liu hosi komunikadu imprensa, Dr. Mari Alkatiri deklara, deside lori keixa ba Ministeriu Públiku (MP) hasoru CPN partidu CNRT nian, ba lia bosok ne’ebé sira públika hasoru nia.

“Tempu to’o ona ba Timor oan tomak atu hatene lia los kona-ba bosok sira ne’ebé partidu CNRT nia estrutura no kuadru balu halo.Lia los deit mak dalan diak ba Timor-Leste ida Buras Liu,” Dr. Mari Alkatiri konklui

LEAVE A REPLY

Please enter your comment!
Please enter your name here