Reportajen Filomena da Conceição
Komunidade husi suku Manumera, postu administrativu Turiskai, Munisípiu Manufahi, preokupa tebes ba kondisaun estrada ne’ebé aat hodi fó difikulta ba komunidade sira hodi asesu ba iha Edukasaun, saúde no lori sira nia produtu ba iha merkadu, ho ida ne’e sira husu Governu atu labele Promete ho Ibun maibé tenke hadia problema sira ne’ebé maka povu hasoru.
Tuir komunidade Moises dos Reis, husi suku Manumera, postu administrativu Turiskai, Munisípiu Manufahi preokupa ho kondisaun estrada ne’ebé aat hodi difikulta ba komunidade sira atu asesu ba edukasaun. saúde no merkadu. Iha tempu kampaíña boot sira mai promete atu hadia maibe sai tiha boot la interese fali ba iha komunidade nia preokupasaun. Tanba ne’e, husu ba governu atu labele promete ho Ibun maibé tenke hadia estrada sira ne’ebé aat ne’e, atu komunidade sira nia ona bele asesu ba iha edukasaun, saude no lori produtu ba iha merkadu.
“Hanesan komunidade husu liu-liu mak estrada, labele promete ho ibun de’it maibé tenke realiza ka halo estrda diak ba komunidade, atu komunidade sira sente di’ak, tanba ita haree hanesan komunidade sente triste, sira mai promete hela maibé estrada hanesan ne’e nafatin”, dehan Moises dos Reis ba Jornalista sira iha hela fatin Suku Manumera, postu administrativu Turiskai, Munisípiu Manufahi, kinta,11/01.
Nia hatutan, Hanesan Turiskai oan dala ruma ema dehan Proklamdór Francisco Xavier do Amaral nia rain, maibé realidade sai fali hanesan ema ne’ebé la luta ba rai ida ne’e.
“Hanesan komunidade ida ita sente triste, bainhira udan ami arasak duni, ita haree de’it kondisaun agora, realidade mak ita bo’ot sira agora hasoru daudaun ne’e karreta mai la di’ak tanba estrada la di’ak”, dehan Moises
Iha fatin hanesan, xefe suku Orana Domingos Ximenes hateten, problema estrada tinan barak ona populasaun Turiskai hasoru maibé to’o ohin loron seidauk rezolve.
“Estrada mós hanesan husi Suku Urahou tama to’o Same ne’e tinan barak ona governu ko’alia buat ne’e mas la realiza,” haktuir Domingos.
Nia hatutan tan, estrada ida turiscai ne’e hanesan estrada ida ne’ebé ema hotu hatene Membru Parlamentu no Membru Governu sira beibeik ona mai vizita maibé estrada nafatin ladiak, tanba ne’e povu turikai nafatin espesransa iha Governu hodi bele hatan sira nia preokupasaun.
Entretantu postu administrativu Turiskai iha suku 11, aldeia 40 no komunidade iha Postu Administrativu Turiscai maioria moris ho vida agrikultura.
