Reportazen Santina Lucia da Costa
Hafoin rejeisaun Proposta Lei Orsamentu Jerál Estadu 2020, iha loron 17 Janeiru 2020, Prezidente da Repúblika uza kbiit husi artigu 74 Konstituisaun RDTL, atu garante unidade estadu no funsionamentu regular instituisoins demokrátikas.
Liu hosi komunikadu imprensa ne’ebe fo sai hosi media Prezidente da Republika nian informa katak ho kbiit ne’ebe mak Prezidente da Republika halo liu hosi dialogu ho lider politiku no entidade relevante sira hanesan FONGTIL, Juristas, Igreja Katolika no konfisaun relijioza sira seluk, Camara do Comercio e Industria de Timor-Leste, Conselhi Combatentes da Libertasaun Nasional, organizasan rezistensia hamahon-an iha Konsellu Nasional Juventude Timor-Leste, Centro de Estudo para a Paz e Desenvolvimento (CEPAD), Movimentu Asukai Lorosa’e no FORSAREPETIL husi 23 janeiru to’o 07 fevereiru 2020.
Hafoin rona tiha partidus polítikus, organizasoins no institusaun sira, Prezidente da Repúblika, Dr. Francisco Guterres Lú Olo, konvida no sei prezide enkontru ho líder istóriku no personalidade sira, iha loron 10 F evereiru 2020,hodi rona sira-nia hanoin kona-ba situasaun polítiku Konstitusionál rai laran.
Líder istóriku no personalidade sira ne’ebé Xefe Estadu konvida mak eis-Prezidente da Repúblika no eis-Primeiru-Ministru, Kay Rala Xanana Gusmão, eis-Prezidente da Republika, Dr. José Ramos Horta, eis-Prezidente no atuál Primeiru-Ministru, Taur Matan Ruak, eis Primeiru Ministru, Dr. Mari Alkatiri, Xefe Estadu Maior Jenerál F-FDTL, Majór-Jenerál Lere Anan Timur no veteranu Dr. Roque Rodrigues.
Hamutuk ho líder no personalidade hirak ne’e, Xefe Estadu sei halo análize no identifika opsaun sira ne’ebé di’ak liu hodi hadia situasaun polítiku-Konstitusional atual.
Liu hosi komunikadu imprensa mos esplika katak, Xefe Estadu mós sei rona no tetu hanoin sira hosi ninia órgaun konsulta Konsellu Estadu, molok foti dezisaun relasiona ho situasaun polítiku-Konstitusionál ne’ebé oras ne’e nasaun hasoru.
“Prezidente da Repúblika kompromete atu nafatin hala’o diálogu hodi rona hanoin husi lider no sidadaun sira, atu ita hotu hamutuk lori polítika dezenvolvimentu ba povu tomak nia bem-estar no justisa social. Ba Povu no Nasaun nia di’ak, Prezidente Repúblika sei halo esforsu hotu-hotu”, deklara Prezidente Lu Olo.
