Reportajen Filomena da Conceição
Reprezentante Santa Sé iha Timor-Leste Marco Sprizzi ohin hasoru malu ho Prezidente Republika (RP) José Ramos-Horta hodi avalia vizitasaun Papa Fransisco mai Timor-Leste. Iha vizita refere mos reprezentante Santa Sé jato’o agradese ba povu Timor-Leste, tanba hatudu Maturidade Iha vizitasaun Papa nian.
“Sorumutu ida ohin ho Prezidente Repúblika José Ramos-Horta, hodi avalia hamutuk kona-ba vizita Papa Francisco nian mai Timor-Leste ne’ebé nu’udar ksolok no susesu, grasa no bensaun ne’ebe extraordináriu ba Timoroan hotu”, dehan Marco ba jornalista sira iha Palásiu Prezidensiál Bairo-Pite, Kinta 3/10.
Nia Esplika, Iha vizita Apostóliku Papa Francisco nian ne’e sai mos hanesan espatkulasaun bo’ot ida ba mundu tomak, hanesan Prezidenti Repúblika haktuir katak nia belun sira barak iha mundu liu-liu husi Estadus Unidus Amérika, Brazil, no Europa tomak, hotu-hotu akompaña no haree imajen no vídeos sira kona-ba oinsa povu Timor-Leste nia maturidade ho kapadidade organiza eventu boot ida-ne’e ho mobilizasaun povu-sarani iha istória Timor-Leste nian.
“Agradese ba Maromak, ba povu, ba Papa Francisco, ba governu no estadu Timor-Leste, maibé liu-liu ba povu Timor-Leste ne’ebé hatudu maturidade, pasífik, entuziazmu ho fiar ne’ebé sai nu’udar roman ba iha Ásia no mundu tomak”, Nia agradese ba povu no sarani Timor-Leste.
Nia salinenta, hanesan reprezentante Papa sente kontente los tamba ho servisu sira preparasaun nian kuaze tinan ida tomak, ho kolaborasaun entre Igreja lokál ho Governu Timor-Leste hatudu rezultadu ida kmanek no bo’ot tebes liu tiha saida mak ema hotu hanoin.
Maibé ho rezultadu no susesu ne’ebé iha hatudu buat balun ne’ebé la perfeitu ka iha naksalak oan ruma, ida ne’e atu konfirma katak iha rai ne’e buat hotu la perfeitu no ida perfeitu liu ne’e iha deit lalehan.
Tanba moris iha rai la hanesan ho iha lalehan, iha rai iha buat ki’ik balun ne’ebé la perfeitu, no ida ne’e mak ema nia realidade moris iha rai ne’e.
