Reportajen Adroaldo “Saretukau”
Traballador hosi ajénsia Down to Earth, Labour Solutions no Connect Group ne’ebe lokaliza iha Sidade Manjimup, Perth, Estadu Western Australia, Australia, selebra loron Finadu hamutuk ho aktividade selebrasaun misa no kari ai-funan hamutuk iha Semitériu Manjimup.
Reprezentante Organizadora, Marcelina Ramos hosi kompañia Labour Solutions ba Neon Metin hatete, “ita iha inisiativa tebes atu organiza juventude Seasonal Worker ne’ebé mak servisu iha Austrália, liu-liu ba TImoroan sira ne’ebé mak servisu iha Perth nomos ba ami ne’ebé mak iha Manjimup.”
“Iha inisiativa rasik atu halibur joven Seasonal Worker atu hamutuk iha fatin ida ne’e, atu komemora loron 2 de novembru (finadu) atu hanoin hikas fila-fali ita-nia maluk sira ne’ebé mak fila ona iha mundu seluk.” dehan Ramos depois de misa, iha Manjimup, sábadu, 02/11.
Nia dehan, “depois de misa, ha’u sei organiza ha’u nia grupu nomos grupu seluk hosi ita Timor hotu ne’ebé mak servisu iha ne’e, sei lori ai-funan no lilin ba kari iha semiétriu Manjimup, depois ita sei fila mai hamutuk, tuir ita Timor nian hemu be manas ruma, ita fahe malu.”
Nia sente todan wainhira selebra mesak loron finadu iha Australia maibe ida ne’e bai-bain ona ba nia, tanba nia iha nasaun refere dala barak ona.
“Tinan ida ne’e todan ba ha’u, tanba ha’u mai ha’u nia pai foin mate fulan ida, ida ne’e todan ba ha’u, maibé ha’u sente di’ak hela tanba nafatin iha Austrália, ita nafatin halo tuir ita nia kultura, ne’ebé mak Timor-oan nian, maske ha’u dook hosi família sira, ha’u la sente triste tanba ha’u nafatin hamutuk ho kolega feto, mane sira, nafatin fo liman malu, fo fuan ba malu, tanba ida ne’e ha’u sente difisil maibé di’ak hela.” dehan Ramos ho triste.
Fatin hanesan, traballador ajénsia Down to Earth, Belchior Fernandes, hatete, Finadu nu’udar loron ne’ebé ita hanoin hikas sira ne’ebé laiha ona ita-nia sorin (mate), maibé ita-nia domin boot tebes ba sira, “tanba liu hosi sira ita hato’o ita-nia orasaun, buat hotu ita harohan ba sira, sira loke dalan ba ita, ohin loron ita goja iha ema nia rai.
“Ho loron Finadu horisehik, horibarua ne’e, kontente mai ita maibé triste mak barak, tanba ita la besik iha sira nia rate, hosi dook de’it, maibé sira nia domin, sira nia espíritu, sempre hamaluk ita iha ne’e rai Australia ida ne’e.” Belchior expresa nia sentimentu.
