Reportajen Umbelina dos Reis
Komemora loron nasional juventude ba dala-19 no Masakre Santa Kruz, 12 de novembru ba dala-33, Juventude Hadomi Natureza (JHN) Na’in sanulu resin Lima (15) feto na’in tolu, mane na’in sanulu resin rua (12) viajen la’o ain hosi munísipiu Lautem to’o mai kapital Dili. Objetivu atu fo hanoin hikas ba foinsa’e sira katak juventude loriku as-wa’in sira nia luta ba ukun rasik an iha momentu ne’eba terus no susar tanba hakarak luta ba libertasaun nasional.
Membru Juventude Hadomi Natureza (JHN), Romario Amaral hateten, komemora loron juventude dala-19 JHN hala’o atividade la’o ain hosi munísipiu Lautem to’o mai Dili ne’e hodi hanoin no la’o tuir loriku as-wa’in sira nia ain fatin, nune’e sente orgullu tanba komemora loron loriku as-wa’in sira nia luta ba ukun rasik an ne’ebé koñesidu iha mundu Internasional.
“Juventude Hadomi Natureza (JHN), feto na’in tolu no mane na’in sanulu resin rua ne’ebé hala’o atividade la’o ain hosi munísipiu Lautem, ne’e nia objetivu atu fo hanoin fila-fali juventude loriku as-wa’in sira ne’ebé luta ba ukun rasik an, nune’e liuhosi atividade kiik oan sira ne’e ita bele sente, oinsá sira nia luta iha momentu ne’eba, ne’e ita sente triste tebe-tebes.” Dehan Romario Amaral, ba jornalista Neon Metin, iha Semiteriu Santa Kruz, Kintal-boot, tersa-feira, 12/11.
Nia dehan, viajen la’o ain hosi munísipiu Lautem to’o mai Dili hahu hosi dia 4 novembru, deskansa kalan primeiru iha Laivai, tuir sira la’o to’o kalan deskansa iha komunidade sira ne’ebé besik estrada sira ne’e nia uma, la’o nune’e to’o Dili. Viajen la’o ain durante loron sia (9), dezafiu ne’ebé sira hasoru mak ekipa balun ain moras, ain kanek, hamlah no hamrok maibé ekipa sempre fo korajen ba malu esforsu para tenki to’o tanba funu seidauk hotu.
“Dala-ruma ami tuir dalan kareta balun para ba ami katak se imi la’o labele ona bele sa’e kareta de’it ona, maibé ami sempre fo hanoin ba malu katak se ita sae kareta entaun ita nia misaun no visaun (misi) sei falla ka gagal. Ekipa primeiru la’o ain hosi munísipiu Lautem na’in sanulu, to’o mai munísipiu Baucau, Bucoli mak ekipa na’in lima tama tan, total na’in sanulu resin Lima (15). Juventude sira ne’e hosi Juventude Hadomi Natureza (JHN), Esana (UNPAZ), Esana Paulos, Esana (UNITAL). Atividade viajen la’o ain ne’e ba segundu nian, viajen primeiru ne’e tinan 2016 hale’u la’o ain iha Timor durante loron haat nulu resin ida.” Nia esklarese.
Nia mensajen ba maluk juventude sira katak nu’udar foinsa’e tenki kria atividade ne’ebé iha valor no kontribui ba rai ida ne’e nian. Mezmu liuhosi atividade ki’ik oan sira hanesan ne’e maibé iha duni valor.
Iha fatin hanesan membru JHN, Aida Ratna de Deus Fernandes Gama hateten, sente orgullu nu’udar Timor oan tanba ohin ita selebra tan loron Juventude nian ba dala-19. Mezmu la’o ain hosi munísipiu Lautem to’o mai Dili maibé ne’e faz parte iha prosesu luta na’in sira nia ain fatin.
“Durante ami viajen la’o ain hosi munísipiu Lautem to’o mai Dili, nia dezafiu ne’ebé ami hasoru mak loron manas Morgan, nune’e ekipa balun de idrasaun tanba hamlaha no hamrok tanba bee ne’ebé lori labele augenta, maibé ami esforsu la’o ain to’o duni iha Dili.” Haktuir Juventude Hadomi Natureza, Aida Ratna de Deus Fernandes Gama, ba jornalista Neon Metin, iha Semiteriu Santa Kruz, tersa-feira, 12/11.
Mensajen ba maluk foinsa’e sira, selebra loron juventude nasional labele partisipa de’it iha media sosial maibé partisipa direita iha atividade nune’e bele dezenvolve ita nia kapasidade tanba kontribuisaun no partisipasaun ne’e importante. Nune’e husu mos ba feto maluk sira tenki partisipa másimu iha loron importante sira hanesan ne’e, tanba agora iha ita nia nasaun iha ona igualdade jeneru.
