Reportajen Filomena da Conceição
Presidente Autoridade Munisipiu Dili (PAM), Gregorio Saldanha husu ba Komunidade sira iha Dili, tenke haloot mate isin iha semiteru, labele hakoi mate isin besik uma ka iha uma nian sorin no kintal sira, tanba ida ne’e fo implika ba ema nia saude.
“Lei bandu komunidade sira labele hakoi mate isin iha Uma Sorin ka kinta laran, tanba fo implikasaun ba ema nia saude, maibe governu mos tenke prepara fatin atu hakoi mate isin sira”, dehan Gregorio ba jornalista Sira iha edifisiu PAM kaikoli, sesta/ 24/01
Nia Informa, atu evita komunidade sira labele hakoi mate isin iha uma sorin ka kintal sira mak autoridade lokal sira tenke ajuda PAM, hodi bele kontrola komunidade sira atu nune’e, sira labele halo’ot, nafatin mate isin ka lixu sira besik Uma sorin.
“Hau husu nafatin atu autoridade lokal ka komunitariu sira ajuda atu organiza nafatin mate isin sira exemplu: mate iha fatin ida tenke Informa ba autoridade lokal sira ka munisipiu Dili, iha diresaun obras publiki nian ne’ebe Konta ba rate sira, para bele hakoi mate isin sira ne’e, atu bele jere tempu sira ne’e, para labele hakoi mate isin iha oras ne’ebe hanesan no bele regula medida husi rate nian”, nia informa
Nia husu mos, ba komunidade sira atu labele hakoi lixu sira besik uma ka fatin ne’ebe lei bandu no labele hakoi animal nia mate isin iha uma sorin, tanba fo impaktu boot ba ema, maske ohin loron seidauk iha fatin atu hakoi animal sira, tanba ema nia isin no animal nia isin hanesan deit no bele dodok sai kontamina ba bee ba ema nia saude, tanba ne’e tenke hanoin ba ida ne’e hotu, no neineik PAM sei rezolve ba ida ne’e.
Nia haktuir, antes ne’e, komunidade sira laiha fatin atu hakoi mate isin no tanba nakonu, no ikus Diretor obras publiku munisipiu nian mai iha ne’e, deside hasai sirkular, hodi bele hakoi ona mate isin iha fatin foun Bekasi nian, no dadaun ne’e Komunidade sira komesa ona hakohi mate iha fatin ne’eba no mos sei prepara rai estadu ida iha Metinaru para atu bele hakoi mate isin tanba rai luan no bele responde ba longu prazu ninian.
“Informa mos ba Komunidade sira tenke kopera no hakruuk ba ita nia lei sira tanba Ida ne’e diak ba ita no estadu hanesan institusaun no ita ema hanesan objetu ka alvu ida no regulamentu Sira atu bele regulariza ita atu moris tuir tanba buat sira ne’e diak ba ita, maibe kuandu Ita hakoi nafatin mate isin iha ita nia uma sorin ita ho ita bia vizinho sira mak sei hetan implikasaun ba moras oi-oin”, Nia Informa
Entretantu, Munisipiu Dili iha rate publiku (5) Mak hanesan Bekusi, Santa Cruz, Bidau Santana no Bedois maibé rate hiraak ne’e nakonu hotu ona, nune’e, extensaun iha bekusi ne’e, ajuda netik para bele hakoi mate iha fatin refre atu nune’e, evita hodi hakoi mate isin iha uma sorin.
