Reportajen Juvinal & Filomena
Uniaun Estudante Universitariu Munisipiu Ermera(UNEUMER) hamutuk ho Movimentu Foin-sa’e Atsabe (MOFA), konsidera PAM Ermera halo traixaun ba nia povu, la reprezenta povu nia Sofrimentu.
“Ita konsidera PAM Ermera matan delek ba relidade sosiál ne’ebé nia povu hasoru iha munisipiu Ermera PAM maka ema ida ne’ebé halo traixaun loloos ba povu maioria iha munisipiu ermera, razaun tamba ta’uk lakon poder ne’ebé atribuidu husi partidu CNRT.
Aliende ne’e, nia maka ema ida ne’ebé dezobedese ba sistema demokrasia, iha estadu direitu demokratiku ida ne’e, nia mos la komprende saida maka komunikadu imprensa no saida maka greve, tanba nia kapasidade lideransa klo’ot tebes interpreta sasan arbiru deit tuir nia inkapasidade ne’e,” dehan porta-voz Jaqeu Maia de Araujo iha komunikandu imprensa, Jardim 05 de Maio, 06/02/2025.
Porta-voz haktuir Pers konferensia ne’ebé maka sira halo liu ba, bazeia ba baze legal ne’ebé maka fo ona diretu mai ema hotu, ne’e nu’udar direitu prerogativa ida hodi manifesta sira nia hanoin no ideia hodi fó advokasia ba desizaun ne’ebé injustu sira, basa ne’e hakerek nanis ona iha konstituisaun RDTL iha artigu 41 kona-ba liberdade ba imprénsa no komunikasaun sosial ninian.
“Ami reprezenta ba povu lian la’ek sira no hirak ne’ebé nia produtu la folin iha merkadu no hetan esplorasaun husi sistema ohin loron. Maibé saida maka akontese, Prezidente Autoridade Munisipiu Ermera (PAM-E) aktual foti dezisaun hodi halo komunikadu imprensa iha loron ha’at fulan fevreiru horibainruak, tenta halo intervensaun, ba estudante sira nia aspirasaun no vontade iha estadu dereitu demokratiku,” dehan porta-voz
Universitariu ne’e dehan PAM nia hare’e assuntu dezenvolvimentu ho kestaun moral nune’e mak nia konvida autoridade igreja katolika, veteranos, no ema espesial sira hodi partesipa iha komunikadu imprénsa ne’ebé foin hala’o loron rua liu ba atu satan deit nia poder.
“Tanba ne’e ami husi uniaun estudante universitariu munisipiu Ermera, hamutuk ho movimentu foin-sa’e Atsabe, apela ba sosiedade hotu husi munisipiu Ermera katak, saida maka PAM Ermera ko’alia la reprezenta povu nia Sofrimentu, se nia dehan nia reprezenta povu tanba saida nia ukun to’o agora la hatudu progresu ruma ba ermera. Ikus liu hakarak alerta tan katak se estrada iha tinan ida ne’e maka nafatin aat. Signifika PAM Ermera ne’ebé partidu CNRT nomeia la reprezenta povu kiik no ki’ak sira, sira reprezenata deit grupu kiik sira hanesan partidu, osan nain no sira nia familia,” dehan Porta-Voz.
