Reportajen Silvino Freitas
Konsellu Imprensa (KI) Timor Leste iha loron 30 Abril 2025 realiza eleisaun ba prezidente KI hodi lidera KI ba mandatu ba tinan 4 hahú husi 2025 to’o 2029, nune’e Antonio Mali eleitu ba prezidente KI ho votu 3 iha eleisaun segunda volta husi kandidatu nain 3 Isabel de Jesus, Antonio Mali no Suzana Cardozo no eleitór mai husi membru KI nain 5.
Prezidente eleitu Antonio Mali dehan, eleitu ba prezidente KI ne’e la’ós papél de’it maibé hanesan mós komprimisu ida ne’ebé hamutuk ho konseleiru sira seluk atu tane as lala’ok média nian responsabilidade integridade ho mós liberdade imprensa nian, nune’e sei responsabiliza hodi divulga informasaun ne’ebé kredivel ba públiku.
“Hau hamutuk ho hau nia kolega konselleiru sira ami sei halo esforsu masimu atu liberdade imprensa iha ita nia rain ne’e atinji duni ninia objetivu tuir ita hakarak, tanba públiku sosiedade merese atu hetan informasaun ne’ebé loos nomós tane aas normas sira kona-ba jornalizmu nian” dehan Prezidente KI eleitu hafoin eleitu iha salaun KI Mascarenhas,(30/04).
Nia konsidera dadaun ne’e servisu KI nian tama ona ba situasaun kritiku tanba ho esisténsia média ne’ebé hahú barak ba daudaun ho plataforma oioin kompara ho uluk, maibé nia iha esperánsa katak servisu ne’ebé lideránsa anterior KI sira rai hela ne’e hanesan fundasaun ida ne’ebé metin ona atu sira bele kontinua hala’o servisu KI nian ba oin.
“Ami nain 3 mai ho kolega nain 2 ene ona, ami mai ho buat hotu prontu ona ami la mai atu halo buat foun ida apalagi ho troka buat balun, ami kontinua de’it buat ne’ebé konsellu sira halo ona durante ne’e ba ha’u ami sorte tebes tanba buat hotu iha ona” dehan Prezidente KI eleitu.
Prezidente KI eleitu ne’e promete laiha toleránsia ba membru sira ne’ebé kontinua halo intervensaun ba servisu jonrnalista sira nian, nune’e kona-ba intervensaun sira ne’e iha ona akordu ruma entre PNTL atu asegura jonrnalista ninia liberdade no seguránsa wainhira hala’o kobertura iha terenu tanba akordu lei no regulamentu sira ne’ebé atu proteje jornalista sira estabelese hotu ona nune’e iha sira nia mandatu sei halo di’ak no hadi’a di’ak liu tan.
“Kona-ba liberdade imprensa ne’e hanesan ami nia alvu atu ami atinji duni tanba karik jonrnalista la livre maka ita sei liha kobertura no informasaun ne’ebé di’ak, kona-ba intervensaun sira ne’e ami nia kna’ar atu responde” Antonio Mali promete.
Fatin hanesan Prezidente KI atual Otelio Ote dehan, planu tuir mai ba KI maka atu hala’o sosializasaun ba lei komunikasaun sosial nian ne’ebé planu hamtuk SEKOMS, nune’e sidadaun sira no autoridade sira bele iha komprensaun ba servisu mundu jornalizmu nian no mós bele rigor iha atribuisaun karteira professionál ba jornalista sira hodi hatene loloos ho momoos ba ema ne’ebé professionál iha mundu jornalizmu nian, nune’e iha revizaun ba lei komunikasaun sosial bele iha mudánsa ba entendimentu ba professional jornalista nian iha nivel baziku medio no altu ho tan kurikulum materia sira ne’ebé atu hanorin ba jornalista sira.
“Hanesan ita hotu hatene, bainhira atu hetan karteira professionál ita tenke partisipa lai kolokio sira kona-ba materia sira ne’ebé ita boot atu ezerse iha ita boot nia profisaun” dehan Prezidente KI Otelio Ote. Nia konklui katak, nafatin iha kooperasaun ho média husi soudeste aziatiku hodi luta ba liberdade imprensa kualidade jornalizmu nian iha Timor Leste, buka mos servisu hamutuk ho intituisaun sira hodi taka lakunas sira ba liberdade imprensa ne’ebé dadaun ne’e Ti
