Reportajen Silvino Freitas
Institutu Nasionál ba Defeza Direitu Labarik nian (INDDICA) rekonese labarik sira ne’ebé fa’an sasan iha fatin estasaun semáfro nian liuliu iha area Delta-Nova ne’e risku duni ba sira nia vida, nune’e sira nafatin halo monitozisaun ba estasaun semafro iha area delta-nova nian hodi sira mós iha ona kooperasaun ho autoridade munisipiu Dili fo prioridade hodi tau matan, INDDICA mós servisu hamutuk ho polisia nune’e labarik sira kuandu fa’an bainhira polisia laiha.
Prezidente INDDICA Dinorah Granadeiro dehan, dadaun nee INDDICA servisu hamutuk ho polisia nunee numeiru labraik ne’ebé faan sasan iha dalan ninin liuliu iha area estasaun semafro nian menus kompara ho uluk, nunee husi apoiu ne’ebé governu liuhusi ministeriu solidaridade social labarik balun hakamatek iha uma husi parte INDDICA mos fasilita sira hodi hatama iha kolejiu iha munisipiu hodi hela ho madre padre sira no balun eskola hodi hases labarik sira husi faan sasan iha dalan ninin.
“atuasaun nee ita nafatin halo hela maibe ita mos rekonese katak nafatin iha labarik nain 4 ka 5 mak nafatin faan hela ami observa hela sira nia situasaun agora mos buka hela solusaun ba sira, apoia balun ne’ebé MSS atu fo ba sira nee iha hela prosesu nia laran atu responde diak liu bainhira mak apoia nee bele too ba iha sira nia liman hodi bele hases sira husi fatin neeba” dehan prezidente INDDICA Dinorah ba jornalista sira iha salaun MSSI Kaikoli, (29/07).
Prezidente INDDICA mos rekonese fatin estasaun semafro ne’ebé labarik sira faan sasan nee area ne’ebé risku tebes ba labarik sira dalaruma iha motor balun ne’ebé halai velosidade makaas maka labarik sira tama ba korta bele fo risku tebes ba labarik sira nia vida, nunee INDDICA nafatin servisu hamutuk ho polisia no halo mos enkontru ida ho autoridade munisipiu Dili atu haree ba asuntu ida ne’e tanba nee mos tama ba kompetensia autoridade munisipiu Dili nian nunee sira bele tau asuntu nee tau prioridade ba sira nia servisu.
“ami kontinua akompana hela sira kada semana ami kontinua monitorin sira nia situasaun nafatin koalia ho sira enkoraja sira nia inan aman, sira haree polisia laiha sira faan servisu nee tranzitu toma atensaun ona tanba ita servisu hamutuk ho sira liuliu iha Delta nian kuandu polisia iha sira la faan laiha sira faan hatudu katak polisia sira mos hahu halo sira nia papel hodi asegura labarik sira labele faan” dehan Dinorah.
Antes nee Portavoz PNTL suprentidente Joao Belo dos Reis dehan, labarik sira ne’ebé faan sasan iha estrada ita haree kestaun seguransa ba labarik sira nee parte polísia mos preokupa maibe atuasaun ne’ebé polísia halo tenke involve INDDICA hodi halo asaun ruma tanba nee risku ba labarik sira nia vida iha area estasaun semafro nian, nune’e polísia nafatin hala’o ninia kna’ar bolu labarik sira ba eskuadra PNTL hodi koalia ho inan aman atu labele halo maibe nafatin labarik sira kontinua fa’an sasan iha area estasionamentu semafro nian, tanba sira labarik entaun komptensia polísia nian mak bolu inan aman.
