Reportajen Umbelina dos Reis
Primeiru Ministru Kay Rala Xanana Gusmão hateten, estabelesimentu Banku Dezenvolvimentu Nasionál ida sei sai pasu krítiku ba konstrusaun ekonomia ne’ebé forte, inkluzivu no diversifikadu iha Timor-Leste. Tanba Banku Nasionál Dezenvolvimentu forma parte integrante husi ita-nia vizaun nasionál, hanesan hatuur iha planu estratéjiku dezenvolvimentu ba programa governu nian.
“investe iha setor edukasaun atu hametin rekursu umanu ne’ebé ita presiza ba dezenvolvimentu mak liuhosi harii infraestrutura krítiku sira, inklui estrada no ponte no enerjia ba komunikasaun sira.Tanba povu luta naruk hodi alkansa ita-nia mehi ba ukun rasik-an. Agora ita hasoru luta foun ida la’ós atu mehi de’it maibé atu harii metin nasaun ida.” Dehan Primeiru-Ministru Kay Rala Xanana Gusmão, liuhosi nia diskursu, iha Auditoriu Ministériu Finansas Ai-tarak laran, sexta-feira, 01/08.
PM dehan, Enkuantu asegura ona soberania polítika, agora importante tebes atu asegura ita-nia soberania ekonómika no konsolida estadu, bainhira laiha setór privadu ida ne’ebé dinámiku, reziliente, Kresimentu no ekonómiku ba iha progresu. Nune’e ita tenke halo buat barak liután atu apoia empreza ki’ik no médiu ba ekonomia, motór ba kriasaun empregu no xave ida atu hamenus dependénsia ba importasaun.
Asesu ba kapitál hosi fasilitadór sira ne’ebé maka’as liu ba potensiál umanu, maski ita-nia ema barak liu maka taka sai hosi ekonomia la’ós tanba falta vontade ka abilidade, maibé tanba sistema ekonómiku la fó oportunidade ba sira.
” Ha’u ko’alia ho na’in ba negósiu barak iha Dili no rai laran tomak no sira hotu hateten buat ne’ebé hanesan mai ha’u, ami hakarak buras, maibé ami labele hetan kréditu”. Dehan PM.
PM konklui, labele harii ekonomia soberanu ida se ita-nia povu hetan negasaun ba oportunidade atu partisipa iha ida-ne’e. Falta kapitál la’ós de’it problema tékniku ida, ida-ne’e hanesan barreira estruturál ida ba dezenvolvimentu.
