Reportajen Silvino Freitas
Ministériu Administrasaun Estatál (MAE) hamutuk ho Kámara Komérsiu Indústria-Timor Leste (CCI-TL) sei fasilita karreta 110, hodi tula eleitór sira hosi munisípiu 12, nune bele tuir votasaun iha eleisaun segunda-volta, maibé Rejiaun Administrativa Espesiál Oe-cusse Ambenu (RAEOA) la konsege ona atu fasilita.
Tuir Portavoz Governo Ministru Asuntu Parlamentár no Komunikasaun Sosial (MAPKOMS), Francisco Jeronimo hateten daudaun ne’e governu infrenta hela preokupasaun kona ba eleitór sira ne’ebé hela iha kapitál Dili, atu fila ba idak-idak nia munisípiu hodi tuir votasaun iha eleisaun prezidensiál segunda-volta.
“Tanba ne’e MAE servisu hamutuk ho CCI-TL sei fasilita komunidade sira ne’ebé hela iha Dili, atu ba partisipa eleisaun iha postu idak-idak, no governu prepara karreta 26 no karreta balun fasilita hosi seitor privadu ne’ebé haman an iha CCI-TL hodi lori komunidade ba tuir votasaun iha munisipiu” dehan Portavoz Governu, Francisco Jerónimu iha salaun enkontru MAE Dili,(14/04).
Nia hatutan komunidade sira sei konsentra iha fatin tolu mak Regiao 1 Manatutu, Baucau, Vikeke no Lautein iha Centro Convensoens Dili, Regiao 2 Aileu, Ainaro, Manufahi no Covalima iha Kaikoli Tribunal Rekursu nia oin no Regiao 3 Likisa, Ermera no Bobonaro iha Tasi-Tolu.
“Munisipiu Bobonaro postu Bobonaro, Lolotoe no Kailako, Baucau postu Kelikai no Baguia, Ermera postu Atsabe no Letefoho, Vikeke Lautem no Covalima Postu tomak, munisipiu hirak nee mak sei aranka uluk iha dia 17 ba munisipiu idak-idak tamba ho distansia ne’ebé dook” nia dehan.
Entretantu Munisípiu Aileu, Ainaro, Manufahi, Likisá, Manatutu, Baucau postu 4, Ermera postu 4, Bobonaro postu 3 sei aranka iha loron 18.
“Atu apela de’it ba eleitór sira kata,k la presiza ansi hadau malu karreta tanba transporte sufisiente ona atu tula imi too idak-idak nia postu, importante mak asegura ita boot sira nia an durante viajen atu nunee labele akontese buat ne’ebé ita hotu lakohi no la espera no keta haluha kartaun eleitoral mak importante liu” nia sujere.
Nia konklui katak governu fasilita de’it transporte atu tula eleitór sira ba too iha postu hodi tuir votasaun, maibe wainhira fila mai Dili idak-idak mak responsabiliza rasik, preparasaun governu nia ne’e karreta de’it enkuantu Aviao ho Ró laiha kondisaun.
