Reportajen Silvino Freitas
Liuhusi vizita Sekretáriu Estadu Kooperativa (SEKOOP) ba grupu aifunan ho modo no strawberry iha Maubisse, SEKOOP iha estratejia hakarak transforma grupu rua ne’e atu rejista an sai kooperativa atu bele hetan tulun husi SEKOOP, tanba grupu sira ne’ebé dadaun ne’e ejiste hetan apoiu husi programa ajensia internasional sira, nune’e sei laiha sustentabilidade ba sira nia grupu programa husi ajénsia internasionál sira remata.
SEKOOP Arsenio Pereira dehan, ninia vizita ba grupu produsaun aifunan, modo no strawberry iha Maubisse haree ninia kreatividade sira atu governu bele haree oinsa sira nia rendimentu bele sustenta sira nia moris no família, nunee sira mos iha difikuldade ne’ebé hato’o ba SEKOOP hakarak atu bele hetan fasilidade ruma husi governu maskí dadaun ne’e iha ajénsia balun ne’ebé fasilita sira maibé kuandu programa remata laiha ona ema ruma ne’ebé bele fasilita sira nia grupu.
“SEKOOP iha ninia estratejia rasik atu grupu sira ne’ebé ejisti iha Maubisse oinsá maka bele, ita bele fasilita fali sira kuandu ajénsia nia programa remata ona ita bele fasilita atu sira bele sai kooperativa ho estatuto ba kooperativa ne’ebé sustentabel tanba atu sira bele rejistu iha hodi hetan legalidade iha notariadu, kuandu ida ne’e iha ona difisil ba sira atu fahe malu maibé kuandu grupu de’it depois programa termina hotu ona tanba hau iha esperénsia antes ba gevernu kuaze 20 anos iha sosiedade-sivil” dehan SEKOOP Arsenio Pereira hafoin vizita grupu produsaun aifunan modo no strawberry iha Maubisse, (12/08).
Nia dehan, grupu sira nia esisténsia depende ba doador sira nia programa neebe ho tinan 3 too 5 remata no laiha sustentabilidade tanba sira forma grupu kuandu ajénsia sira sei iha lao kapaz, maibe remata liu tiha fulan balun grupu ne’e remata ona tanba ne’e SEKOOP iha estratejia ne’ebé halo ona kooperasaun ho ajénsia internasionál sira ne’ebé suporta grupu sira atu transforma sai kooperativa.
“Iha ne’e governu hola nia papél hanesan facilitador no regulador atu grupu sira ne’e bele sustentabel nafatin” dehan SEKOOP Arsenio Pereira.
Nia esplika, grupu rua ne’ebé nia hala’o vizita seida’uk sai kooperativa no sei iha grupu nune’e nia ko’alia ona grupu 2 ne’e atu bele husu apoiu ba teknika SEKOOP destakdu sira atu bele akompaña sira, prosesu ne’ebé atu too kooperativa halo mak sei sensebiliza importante husi kooperativa no oinsá ho programa governu nian liga ba kooperativa mak oinsá, nune’e grupu sira neebe hakarak SEKOOP sei fasilita sira tuir dekretu lei kooperativa nian no halo mós formasaun bazika ho ssembleia hodi deisidi sira nia estrutura kooperativa rasik.
“La’ós dehan sai kooperativa mak foin bele apoia maibé grupu mos bele apoia depende ba pedidu submete ba SEKOOP liuhusi tranferensia publiku, maibé sei grupu sira hanesan ne’e bele depende ba sira nia pedidu” hakotu SEKOOP Arsenio Pereira.
