Reportajen Silvino Freitas
Estudante Universidade Nasional Timor Lorosa’e (UNTL) fo solidaridade ba povu West-Papua nia luta no sira konsidera prezensa military Indonesia nian halo jenosídiu boot ba povu West-Papua, nunee Organizasaun Nasoens Unidas (ONU) ho estadu Indonesia tenke fo ona referendum ida demokratiku ba povu West-Papua no prezensa military Indonesia nian iha West-Papua esplora maka’as ona kultura no riku-soin povu West-Papua nian no estudante sira mos ejiji ba igreja Katólika Timor Leste atu fo mós solidaridade umana ba povu West-Papua.
Portavoz estudante UNTL Igrito dos Santos dehan, West-Papua nia soberani laos pretense ba NKRI maibe tanba akordu husi New York mak loke odamatan inferno neebe too dadaun nee povu West-Papua sofre terus, nunee sira nia solidaridade nee parte ida husi luta hanesan ho estudante UNTL nian ba mundu foun ida neebe sira mos mehi, mundu foun neebe justu hanesan ba umanidade tomak, sira halo asaun solidaridade ida ba povu West-Papua tanba asaun genosidiu neebe military Indonesia sira halo ba povu West-Papua no sira mos haree katak Indonesia hamosu Jawanisasi hodi transmigra ema Jawa sira okupa West-Papua hodi halo ema indijena West-Papua sai minoria iha sira nian rain rasik no halakon mos ema West-Papua nia kultura neebe sei domina husi ema Jawa sira.
“sistema kolonialista kapitalista nee atu laos atu esplora deit sumber daya manusia maibe nia mos esplora sumber daya alam iha 1997 Indonesia halo akordu ida ho America hodi fo bemvindo ba fabrika ida naran Priport hodi esplora rikusoin liuliu osanmean iha West-Papua, atu hatan imperalista norte no kolonializmu Indonesia nian” dehan Portavoz estudante UNTL Igrito dos Santos liuhusi komunidaku imprensa neebe realize iha kampus sentral UNTL, (15/08).
Nia dehan, husi konferensia imprensa nee sira ejiji ba governu Indonesia atu hapara operasaun military iha rai West-Papua tanba sira konsidera asaun sira neebe military Indonesia sira halo iha West-Papua halakon ema sivil no labarik minoridade nia vida, tanba sofrementu neebe povu West-Papua infrenta relevante ho povu Timor Leste nia luta ba indepedensia nunee sira ejiji ba Organizasaun Nasoens Unidas (ONU) no estadu Indonesia atu bele halo hikas referendum ba povu West-Papua hodi hili sira nia direitu atu hamutuk ho Indonesia ka ukun rasik an.
“referendum ba povu West-Papua ami hakarak tenke demokratiku bazeia ba ema ida votu ida laos hanesan referendum neebe akontese iha 1963 ba kotuk West-Papua iha uma-kain 800.000 maibe military Indonesia hili deit ema 1025 mak tuir eleisaun no eleisaun ida nee ami konsidera la justu no la demokratiku” dehan Portavos Igrito dos Santos liuhusi konferensia-imprensa.
Nia dehan, sira nia solidaridade neebe halo ba povu West-Papua hanesan povu maubere oan neebe eskola iha UNTL no povu maubere neebe iha istoria naruk moris iha colonial nia okos tanba nee iha dever ho moral atu fo solidaridade ba povu West-Papua hanesan umanu iha dereitu atu hetan indepedensia, solidaridade neebe sira halo iha valor ba umanidade neebe dadaun nee povu West-Papua barak mak lakon ona vida neebe povu balun sai oan-kiak, faluk, lakon rai ho uma, tanba nee solidadaride neebe estudante UNTL halo nee laos krimi maibe atu kumpri mandatu konstituisaun neebe hakerek ona iha konstituisaun RDTL nian.
“nudar timoroan iha dever moral politiku atu fo solidaridade ba nasaun no povu West-Papua ami husu mos ba igreja Katolika iha Timor Leste liuliu bispu nain 3 atu koalia umanidade, kamada hotu hotu atu fo mos solidaridade ba povu West-Papua neebe kleur tebes ona hetan oho husi military Indonesia” konklui Portavoz estudante UNTL Igrito dos Santos.
