Reportajen David da Costa
Ohin Sekretáriu Estadu Komunikasaun Sosiál (SEKOMS) no Konsellu Imprensa Timor-Leste (KI-TL) halo diskusaun, kona-ba esbosu lei komunikasaun Sosiál artigu 38 B kona-ba responsabilidade penál no deside katak hasai ka elimina ona artigu refere. Ho ida ne’e Prezidente Repúblika (PR) José Ramos-Horta husu ba Sekoms Expedito Loro Dias Ximenes ba futuru labele repete halo lei hodi kontrola media no impede servisu jornalista nian.
Prezidente Repúblika (PR) José Ramos-Horta, agradese ba Sekretáriu Estadu Komunikasaun Sosiál Expedito Loro Dias Ximenes, tanba esbosu lei komunikasaun Sosiál artigu 38 B kona-ba responsabilidade penál ne’e seidauk tama iha faze diskusaun maibé elimina tiha ona.
“Ne’e Expedito mak halo, ha’u nia alin Expedito ne’e ema di’ak elimana ona esbosu lei ne’e, tanba se sira la elimina mai ha’u veta esbosu lei artigu 38 B, kona-ba kriminaliza produtu jornálistiku nian ne’e,” dehan Prezidente Repúblika José Ramos-Horta hafoin remata enkontru semanál ho PR Horta iha Palásiu Prezidensiál Bairu-Pite, Kinta 14/08.
Maibé governu sira bele halo lei saida de’it, maibé labele halo lei hanoin de’it ka hamate fali servisu jornálistiku. Se governu maka halo lei atu hamate liberdade imprensa, lei to’o iha nia sei veta.
“Bom bá ha’u Governu bele halo oin-oin maibé labele halo lei ne’e hodi hamate liberdade Imprensa, sei lei dekretu lei ruma, mai maka ha’u haree ke atu kontrola fali mídia atu halo difisil bá mídia nia servisu hanesan ita boo, ha’u veta,” nia dehan
Entretantu, iha fatin hanesan Sekretáriu Estadu Komunikasaun Sosiál, Expedito Loro Dias Ximenes halo pontu de vista katak esbosu lei antigu 38 B elimina tiha ona iha ámbitu diskusaun SEKOMS ho Konsellu Imprensa no mós asuntu ida ne’e informa ona ba jornalista sira.
“Ohin ha’u dehan tiha ona lei eliminadu ona ne’ebé lalika preokupa ohin ha’u esplika tiha ona mídia lubuk ida iha ne’ebá, ne’ebé pergunta ida-ne’e la presiza responde,” dehan Expedito hodi hatan perguntas ne’ebe jornalista sira husu ba Prezidente Repúblika.
