Reportajen Silvino Freitas
Polisia Nasional Timor Leste (PNTL) liuhusi seksaun tranzitu nasional durante tinan ida hahu husi fulan janeriu too dezembru rejista kazu asidente 2,224 ema lakon vida 114 nunee tranzitu nasional mos konsege hatama koima ba kofre estadu hamutuk milaun ida resin.
Xefe Departamentu Koordenasaun Jestaun Risku Formasaun Edukasaun Sivika, Suprentidente Assistente Polisia Domingos Sarmento Gama dehan, relatoriu annual neebe hahu husi janeiru too dezembru tinan 2025 kazu asidente haumutuk 2,224 nee rejulta ema 114 maka lakon vida, kanek todan 411 no kanek kmaan 2,625 nunee hatudu katak husi numeiru nee kazu asidente neebe ho numeiru as nunee iha kada tinan ema neebe lakon vida kauza husi asidente nee husi 100 ba leten.
“fatores husi kazu asidente sira nee barak liu mai husi ema katak kondutor sira mak la dun atensaun ba movimentu viajen sira no laiha fatores ruma mai husi natureza, entaun oinsa maka ita bele minimize numeiru hirak nee tenke iha sensibilizasaun ba lei kodigu estrada numeiru 6/2003 nee ba sidadaun sira ba estudante sira iha capital dili kuaze universidade ita halo ona maibe nafatin akontese” dehan Suprentidente Assistente Polisia Domingos Sarmento Gama liuhusi konferensia imprensa iha komando jeral Kaikoli, (08/01).
Nia dehan tan, kazu asidente neebe numeiru as liu maka iha munisipiu Dili hamutuk 1297 ema lakon vida 33 kanek todan 175 kmaan 1250 tuir maka Likisa hamutuk 216 lakon vida 13 kanek todan 44 kmaan 366 no Baucau hamutuk 160 lakon vida 19 kanek todan 26 kmaan 247 numeiru neebe kiik liu maka Atauro durante tinan ida ema lakon vida 2 tanba illa kiik no movimentu transporte mos kiik kompara ho munisipiu seluk, nunee durante tinan ida polisia tranjitu hatama mos koima ba kofre estadu hamutuk $799,005.00 total husi munisipiu 13 inklui RAEOA.
“total reseita ba kofre estadu nee ita sukat husi numeiru infrasaun sira nee signifika ita nia sidadaun sira seidauk iha konsensia utiliza transporte iha estrada publiku, dalaruma sira koko atu infrasaun viola lei kodigu estrada, tanba iha nasaun seluk kompara ho ita nia sidadaun sira barak liu la tauk lei maibe tauk mak polisia” dehan Suprentidente Assistente Polisia Domingos Sarmento Gama.
Nia konklui, durante tinan ida mos sira hatama reseita balun husi pontu saida no entrada estranjeiru nian husi veikulu estranjeiru iha tinan 2025 hahu husi janeiru too dezembru hamutuk $213,831.00 taxa neebe rekolla husi movimentu sirkulasaun trasporte neebe mai husi Kupang Atambua balun neebe tula sasan no transporte privadu sira.
