Home Notisia Embaixador Thailandia no Korea do Sul Aprezenta Karta Kredensial ba Xefe Estadu

Embaixador Thailandia no Korea do Sul Aprezenta Karta Kredensial ba Xefe Estadu

259
0

Reportazen Santina Lucia da Costa

Embaixador Thailandia ho Republika Korea aprezenta karta Kredensial ba Prezidente Republika, Dr. Francisco Guterres Lu-Olo, atu nune’e embaixadore rua ne’e bele avontade ona halo serbisu.

Hafoin aprezenta karta kredensial, Ministra Negosiu Estranjeiru no Kooperasaun (MNEK), Adalgisa Magno ba jornalista sira hateten katak Prezidente Republika Dr. Francisco Guterres Lu-Olo, simu kredensial rua husi nasaun amigo Thailandia ho Korea do Sul, sira mai iha ne’e loron balun ona.

Ministra Adalgisa hatutan husi parte Thailandia, hakarak tebes atu kontinua esforsu ne’ebé mak halo tiha ona, liuliu ba komprimisiu husi sira nia prinseja ne’ebé mak uluk mai Timor, para hodi halo ajuda humanitaria projetu balun iha ne’e.

“Depois mós husi Thailandia hakarak tebes atu sira kontinua suporta Timor-Leste nia adesaun ba Asean, sira iha komitmentu hanesan país membru Asean ida, sira kontinua para atu halo esforsu para Timor-Leste sai lalais membru Asean”, hateten Adalgisa Magno iha Palasiu Prezidensial, Nicolau-Lobato, Bairu-Pite, Dili, 15/01.

Konaba Embaixador Korea do Sul nian, Ministra Adalgisa hateten sira sei halo esfrosu tomak, mobiliza emprezariu sira husi Korea para bele mai halo investimentu iha Timor, nia hateten Timor furak tebes nia haree husi nia rezidensia ba Ataúro ne’eba, nia senti katak nia tenki lori ema mai investe iha Timor.

Nia dehan normalmente, pratika jeral kada embaixadór ho diplomata nia serbisu ne’e tinan tolu, bele extende liu tan to’o tinan haat no lima, mais pelumenus liu maibé normalmente estandar ne’e tinan tolu.

Adalgisa Magno realsa tan katak kona-ba aprezenta karta kredensial ne’e, Prezidente Republika Dr. Francisco Guterres Lu-Olo apresia ba esforsu ne’ebé mak rai rua ne’e halo. Prezidente Republika husu para atu rai rua ne’e bele hametin liu tan amizade ho Timor-Leste no hametin liu tan kooperasaun entre país tolu.

LEAVE A REPLY

Please enter your comment!
Please enter your name here