Reportajen David da Costa
Australian Broadcasting Corporation-International Development (ABC-ID), hamutuk ho Embaixada Austrália iha Timor-Leste, realiza diálogu Dijitál Timor-Leste 2026, ho objetivu atu ko’alia kona-ba situasaun atuál media Timor-Leste nian, liga ho dezafiu no esperansa ba futuru iha transformasaun dijitál globál nian.
Fiona Churchman husi Australian Broadcasting Corporation-International Development (ABC-ID), dehan, diálogu loron rua ne’e sei foka liu ba reflesaun kona-ba kondisaun atuál media nian iha Timor-Leste no pasu konkretu sira ne’ebé bele foti hodi garante kualidade notísia atu nune’e notísia sira to’o ba públiku ne’e bele kualidade nafatin.
“Ita hatene mundu mídia nian iha mudansa, ho AI, algoritmu sira, no plataforma dijitál oioin, tanba ne’e jornalizmu ho kualidade tenki alkansa nafatin nia audiénsia. Ami hakarak diskute saida maka media Timor-Leste nian bele kontrola no implementa hodi buras iha futuru”, dehan, Fiona Churchman ba jornalista sira iha Salaun Maubara Timor Plaza, sexta 13/02.
Nia afirma, durante iha diálogu ne’e peritu oioin hosi Filipina, Indonézia, no Austrália marka prezensa hodi fahe sira nian esperiénsia kona-ba prátika di’ak liu iha sira nia nasaun ida-idak, inklui estratéjia sira sustentabilidade negósiu mídia nian, utilizasaun ferramenta dijitál sira no AI iha sala redasaun sira, no protesaun seguransa dijitál sira ba jornalista sira.
Péritu sira ne’ebé sai oradór iha diálogu ne’e mak hanesan IKathryn Raymundo, ne’ebé foku ba diskute monetizasaun no viabilidade negósiu media nian, Craig McCosker ko’alia kona-ba utilizasaun AI iha sala redasaun sira, Andre Yuris ko’alia kona-ba seguransa dijitál, no Mary-Louise Vince, ne’ebé ko’alia kona-ba introdusaun jornalismu movel.
Iha fatin hanesan, Partisipante Prezidente Asosiasaun Jornalista Timor-Leste (AJTL), Zevonia Viera, mos hateten, treinamentu ne’e hanesan oportunidade importante ida, liuliu ba joven jornalista sira iha era dijitál. Tanba ida ne’e ajuda jornalista foinsa’e sira komprende kona-ba artifisiál inteligente no analiza informasaun sira ne’ebe maka espalla iha publiku.
“Ita iha ona era dijitál tanba ne’e asuntu barak espalla iha mídia sosiál no halo ema sai vulneravel, liuliu sira ne’ebé ho literasia dijitál limitadu. Tanba ne’e, treinamentu ne’e ajuda jornalista sira atu komprende kle’an liután literasia AI, analiza informasaun ne’ebé sirkula, no fó apoiu ba públiku hodi hetan informasaun ne’ebé kredivel,” nia dehan.
Nia salienta, kompriende utilizasaun ferramenta sira hanesan ChatGPT bele ajuda jornalista sira halo peskiza no estudu kazu bainhira prepara relatóriu ka notísia ruma.
Nune’e mos Jornalista husi Agensia Tatoli, Arminda Fonseca, hateten, treinamentu ida ne’e importante tebes ba jornalista sira hotu atu aprende kona-ba Artifisiál Inteligente (AI) tanba ida ne’e bele ajuda jornalista sira hodi halo peskiza, verifika informasaun sira liu husi AI.
“Hanesan jornalista ne’ebe ativu hodi halo kobertura iha tereinu, ha’u kontente tebe-tebes partisipa iha treinamentu ida ne’e tanba liu husi treinamentu ida ne’e bele hasa’e hau nia kapasidade di’ak liu tan kona-bá AI nia, tanba ne’e bainhira hau aprende ha’u bele implementa iha ha’u nia servisu fatin,” dehan Arminda.
Entertantu treinamentu ida ne’e, durante hala’o loron rua, hahú husi oin to’o aban, iha treinamentu ne’e halibur jornalista, editór sira, xefe redasaun, sira hodi diskute kona-ba utilizasaun intelijénsia artifisiál (IA), seguransa dijitál, viabilidade negósiu mídia nian, no kombate mis disinformasau.
Aleinde diskusaun sira, atividade ne’e inklui mós sesaun prátika sira kona-ba jornalizmu móvel no halo mapa ba pasu sira tuir mai ba indústria media nasionál. Diálogu Dijitál Timor-Leste nian hanesan parte ida hosi inisiativa rejionál ABC International Development nian, ne’ebé sei implementa iha nasaun ASEAN nian oioin to’o Juñu 2026.
